Bərdə rayonu, Mustafaağalı kəndinin fermerləri “P-Aqro” şirkətindən Sitat.info-ya şikayət ünvanlayıblar.

Redaksiyamıza müraciət edərək, problemlərini ictimailəşdirməyə çalışan fermerlər bildiriblər ki, "P-aqro" şirkətinin Bərdə filialı onları aldadıb. Belə ki, şirkətlə öncədən imzalanan müqaviləyə əsasən 273 hektar pambıq əkilib. Bu il oktyabrın 23-də yığılan pambıq şirkətə təhvil verilsə ə, “P-Aqro" MMC fermerlərin haqqını ödəmir. Aldığı pambığın pulu ödəməyən şirkət günlərdir ki, fermerləri süründürür.

“Bizim müqavilədə göstərilib ki, fermer məhsulu yığıb təhvil veribsə , onun pulu 5-7 gün arasında ödənilməlidir. Lakin 45 gündür ki, haqqımızı ala bilmirik. Məntəqə rəhbərinə, ofis müdirinə dəfələrlə müraciət olunsa da, hamısı nəticəsiz qalıb".

Fermerlər ondan da gileyləniblər ki, "P-Aqro" şirkəti birinci sort pambıqları alsa da, onları aşağı sort kateqoriyasında qəbul edir: "Bu il çox yaxşı məhsul olub. Bu şirkət bizim məhsulumuzun analizini çox aşağı göstərərək, ucuz qiymətə alır. Birinci sorta gedən pambığı aşağı sort pambıq kimi yazır və o cür qəbul etdirir. 10 gün öncə 20 nəfərə yaxın fermer MMC-nin Qaratəpə kəndində yerləşən ofisinə getdik, haqqımızı tələlb etdik. Bildirdilər ki, bütün fermerlərin haqqı ödənəcək. Sonradan xəbər tutduq ki, ümumilikdə 40-a yaxın fermerin cəmii 5 nəfərinə ödəniş ediblər. Bir sözlə bizi aldatdılar. Biz məhsulumuzu təhvil vermişik, pulunu niyə ala bilmirik, hansı səbəbdən? Sonuncu dəfə şirkətdən bizə bildirdilər ki, hara istəyirsinzi gedin şikayət edin. Bir sözlə bizi aldadıblar, haqqımızı yeyiblər".

Məsələ ilə bağlı “P-Aqro” MMC ilə əlaqə saxlamaq üçün şirkətin əlaqə nömrəsinə etdik. Bəlli oldu ki, nömrə aktiv deyil.

Qarşı tərəfin də mövqeyini dərc etməyə hazırıq.

Qeyd edək ki, şirkətin borclu olduğu fermerlərin siyahısı redaksiyamıza göndərilib. Həmin adları əks etdirən fotonu təqdim edirik.