Səhmləri dövlətə məxsus olan səhmdar cəmiyyətlərə büdcədən ayrılan vəsaitlərə görə bu qurumlar dövlət büdcəsinə mənfəət də gətirməlidir. Amma bu gözləntilər özünü doğrultmur.
Ötən il iyulun 15-dən “Azərişıq” ASC-nin elektrik enerjisini istehlakçıya 7 qəpikdən satsa da ASC-nin mənfəəti artmaq əvəzinə, il ərzində 3.7 milyon manat azalaraq 73.1 milyon manata düşüb.
Görünür, bunun nəticəsidir ki, istehlakçıların “Azərişıq”dan narazılığı artıb. Dövlətə gəlir gətirə bilməyən səhmdar cəmiyyət mənfətti istehlakçıdan götürmək istəyir. Əks təqdirdə istehlakçıların bunca narazılığına səbəb nədir? Sakinlər bəzi hallarda işlətdikləri elektrik sərfiyyatından çox məbləğdə ödəniş tələbindən narazılıq eləyirlər. Bu dəfə şikayət Cəlilabad rayonundan gəlib.
... özbaşına cərimə təyin eləyiblər
Cəlilabad rayonu Günəşli kəndindən bir qrup sakin redaksiyamıza müraciət eləyiblər. Nəbi Orucov, Hüseyn Maliyev, Bayram Hüseynov bildirirlər ki, “Azərişıq” ASC-nin Cəlilabad rayon şöbəsi kənddə bir qrup sakinə özbaşlarına cərimə təyin eləyiblər. Tələb olunan cəriməni ödəməyən sakinlər bildirirlər ki, ay yarıma yaxındır elektrik enerjisi kəsilib, işıqsız qalıblar.
“Qəbzdə nə var ödəmişəm, borc necə yarandı?”
Hüseyn Malıyev bildirir ki, vaxtlı-vaxtında pulunu ödəsə də bu cərimə ona haqsız yerə yazılıb: “Hökumətin kilovatını işlətmişəmsə, cərimə eləsinlər. Amma mən işıqpulumu vaxtlı-vaxtında ödəyə-ödəyə bu pulu hardan gətirim verim? Kasıb babayam. Mənə bəhanə gətirilir ki, 2012-ci ildə 5 dəfə, 2013-cü ildə 6 dəfə ödəniş eləmisən, o borclar yığılıb qalıb. Axı mən həmin illərdə Bakıda fəhləlik eləmişəm, evdə nə ailəm olub, nə özüm. Evə gələndə çekə nə yazılıb, ödəmişəm. Bu borclar hardan yarandı? 2014-cü ildə getdim işıq idarəsinə Oqtay adlı işçi Saməddin adlı işçinin yanında məndən 90 manat aldı, dedi ki, borcunu silib, sənə təmizlik aktı göndərəcəyik. Sonra təmizlik aktı verilmədi. Getdim idarəyə narazılıq eləyəndə mənə cavab verildi ki, Oqtay işdən çıxıb, biz bilmirik. 90 manatımı da geri qaytarmırlar”.
“Gücləri mənim kimi kasıb-kusuba çatır...”
Hüseyn Malıyev bildiri ki, keçən il Cəliladad rayon İşıq İdarəsində olub, öyrənib ki, ona olan borcla bağlı elektron sistemlə qəbzdə uyğunsuzluq var: “İdarədə olanda Şirvan rayonundan komissiya gəlmişdi, mən komissiyanın iştirakı ilə kompüterdə yoxlatdım, borcum olmadı, bəs bu borc haradan çıxdı? İşığım martın 10-dan kəsilib. Halbuki o qədər imkanlı adamlar var ki, min kilovat yandırıb, borcunu da ödəməyib. Belə çıxır ki, bunların gücü mənim kimi kasıb-kusuba çatır. İdarəyə gedəndə adamı elə borclu çıxarırlar, qalırsan yana-yana. Deyirlər, danışma, get borcunu ödə. Dünən səhər bir işçisi mənə deyir ki, 50 manat ver, aparım İbrahim adlı işçi var ona verim, hər ay da 20 manat verməklə, hissə-hissə borcunu ödə. Dedim, xeyir ola? İşıqsız da qalsam mən o borcu sizə ödəyən deyiləm”.
“Ödənşlərimiz şəxsi ciblərə gedib?”
Nəbi Orucova isə 850 manat borc gəlib. Bildirir ki, əvvəllər kompüterlə ödəniş olmayıb, o işıq idarəsinin işçisinə ödəniş eləyib, ona məlumat verilib ki, ödəniş cədvələ yazıldı: “Belə çıxır ki, bizim etdiyimiz ödənşlər şəxsi ciblərə gedib. Mən özüm əliləm, evimdə iki ağır xəstə var, imkansız adamam, o qədər pulu hardan alım. Çeklərim əlimdədi. Kəndə “levı” xətt çəkiblər, bundan kimlərsə yararlanıb, borcunu da kasıb-kusubun belindən çıxarırlar. Kim işlədib, özü də ödəsin. Müdir deyir, mənə dəxli yoxdu, ödəməlisiz, vəssalam”.
“Rəis bizi dövlət əleyhinə tərhik eləyir...”
Sakinlər bu qənaətə gəlib ki, bu cür davranışla Aydın Məmmədov bilərəkdən cəlilabadlıları dövlətdən narazı salmağa, ölkə başçısının əlehyhinə qaldırmağa təhrik eləyir: “Müdir özünü yuxarıya işləyən adam kimi göstərir. Kötükdən yoxlatdırmır ki, bu borc hardan yaranıb. Biz deyəndə də ölkə başçısına şikayət edəcəyik, deyir, kimə istəyirsiz gedin, şikayət eləyin, bu işin sahibi mənəm, ödəməlisiz, vəssalam. Biz hesab eləyirik ki, Aydın Məmmədov bu cür münasibətlə bizi vadar eləyir ki, etiraz səsimizi yol kəsməklə və ya başqa bir formada qaldıraq. Biz isə sivil formada ölkə başçısına və “Azərişıq” rəhbərliyinə müraciət edəcəyik”.
Göytəpədə hərbçi və məcburi köçkün ailələri də narazıdır
Göytəpə qəsəbəsində həbçilər üçün şəhərcikdə fəaliyyətdə olan, istər ehtiyatda olan zabitlər və ailələri, eləcə də bu şəhərcikdə məskunlaşan məcburi köçkün ailələri eyni vəziyyətlə üzləşib. Aydın Məmmədov onlarla da kobud rəftar edir.
Elektrik Şəbəkəsinin rəisi: “Narazıdırlar, məhkəməyə versinlər”
“Azərişıq” ASC-nin Cəlilabad rayon Elektrik Paylayıcı Şəbəkəsinin rəisi Aydın Məmmədovla əlaqə saxladıq. Aydın Məmmədov əvvəlcə bizimlə də kobud tərzdə danışdı: “Savadınız varsa, bilirsiniz ki, bütün mülki mübahisələri sonda məhkəmə həll eləyir, əgər belə narazılıqları varsa, məhkəməyə versinlər”.
Narazı vətəndaşlarla mübahisəli məsələ məhkəmə səviyyəsinə gəlib çatıb? Bəlkə vətəndaşları dinləyib, şikayətlərini araşdırasnız, dedikdə Aydın Məmmədov cavab verdi ki, borcu olmayan abonentin işığını kəsməyə kimsə cürət eləyə bilməz: “Bildirişdə borc yazılıbsa, bunu aparat vurur, ola bilməz ki, komptüerdə borc yazılmasın, amma bildirişdə qeyd olunsun. Kimin şikayəti var, qoy məhkəmə həll eləsin. Elə abonentlər var ki, borcunu məhkəmədə mübahisələndirib, məhkəmə də qətnamə çıxarıb. Əlbəttə biz də bilirik ki, indi iqtisadi vəziyyət çətindi, vətəndaşlar bu qədər borcu ödəyə bilməz, ona görə də borcu 12, 15 aya bölürük ki, borcunu hissə-hissə ödəsin. Başqa cür vətəndaşlara necə kömək eləyək? Abonentin ay yarım işıqsız qalması ola bilməz. Həmin abonentlər mənim yanımda olmayıblar. Buyurub gəlsinlər, aydınlaşdıraq”.
Məcburi köçkünlər də limiti aşanda, 4 qəpik əlavə hesablanacaq
Göytəpə qəsəbəsində hərbçilər üçün şəhərcikdə yaranan narazılıqla bağlı EPŞ rəisi belə cavab verdi: “Məcburi köçkün də digər istehlakçılar kimi enerji haqqını ödəməlidir. 300 kilovatdan artıq limiti keçdikdən sonra vətəndaş üçün 4 qəpik əlavə rüsum hesablanır. Bəlkə onlar da limiti aşıblar. Bütün hallarda qəbuluma gəlsinlər, mümkün varsa, köməklik eləyim”.
“Azərişıq” ASC-nin rəhbəri Tanrıverdi Mustafayev isə bildirdi ki, ASC hər bir abonentin işlətdiyi elektrik enerjisinin hesabatı dəqiqliyi ilə aparılır, hansısa abonentin adına artıq elektrik enerjisi yazılmır: “Hansısa abonentin regiondakı elektrik şəbəkəsinin rəisilə bağlı nəsə bir şübhəsi varsa, buyurub mərkəzi aparata müraciət eləsin, məsələyə aydınlıq gətirilsin. Amma mərkəzdən də nəzarət var, idarədən borcun ödənilməsi tələb olunur, abonent də ödəmə aparmaq istəmir, belə narazılıqlar zaman-zaman olub, indi də bu hallar baş verir”.
Borcları israfçılıq yaradır?!
Hurriyyet.org-da dünən “Dövlət vəsaitini kimlər və necə talan edir?” (http://hurriyyet.org/xeberlenti/27629-dovlt-vsaitini-kimlr-v-nec-talan-edir-v-yaxud-azrisiq-asc-y-kulli-miqdarda-borcun-yaranma-sbbi.html) başlıqlı yazı dərc olunub. Yazıda Bakının mərkəzi parklarında (məsələn, Dağüstü Prakda, Binqədi rayon İcra Hakimiyyətinin yaxınlığındakı parkda) günün-günorta çağı elektrik lampalarının söndürülmədiyindən bəhs olunub. Redaksiyamıza müraciət eləyən şikayətçilər də bildirirlər ki, lazım olmadığı halda elektrik enerjisinin bu şəkildə israf olunmasıdır ki, məhz istehlakçılara da belə borclar tətbiq olunur. gəlir.
Tanrıverdi Mustafayevsə bu israfçılığı mentalitetlə əlaqələndirdi və bildirdi ki, bütün hallarda istifadə olunan elektrik enerjisinə görə “Azərişıq” ASC abonentlərindən haqqını alır və bu məsələlərə icra hakimiyyətləri nəzarət eləməlidir.
