Oktyabrın 14-də bıçaqlanan Müşfiq Mədətov hələ də polisin nəzarətindədir.
“Qafqazinfo”nun verdiyi xəbərə görə, saxlanılaraq Səbail Rayon Polis İdarəsinə yerləşdirilən M.Mədətov artıq 2 gündür ki, oradadır. Onun sərbəst buraxılacağı yaxud hansısı əməlinə görə ittiham edilərək məhkəməyə çıxarılacağı bəlli deyil.
Xatırladaq ki, M.Mədətovu bıçaqlayan şəxslərin tutulması üçün əməliyyat keçirilən zaman şübhəli şəxslər Səbail RPİ 9-cu Polis Bölməsinin rəis müavini, polkovnik Orxan Axundzadəni ayağında güllə ilə vurub qaçıblar. Daha sonra keçirilən geniş əməliyyat zamanı, Mədətovu bıçaqlayıb polisi güllələyən 3 nəfər – Kazım Abbasov, Məhəmməd İsmayılov və Emin Həsənov saxlanılıb.
Onlar xuliqanlıqda, adam öldürməyə cəhddə və hakimiyyət nümayəndəsinə müqavimət göstərməkdə ittiham edilirlər.
***
Virtualaz.org-a məlumatlı mənbələrdən bildirildiyinə görə, Azərbaycan prezidentinin mühafizə xidmətinin keçmiş əməkdaşı Müşfiq Mədətov və onun dostu Vəli Vəliyev azadlığa çıxıblar.
Qeyd edək ki, hüquq-mühafizə orqanlarının əməkdaşları onları oktyabrın 14-də Müşfiq Mədətova silahlı hücumdan sonra araşdırma yekunlaşana qədər saxlamışdı.
Xatırladaq ki, M.Mədətov onu bıçaqlamış xuliqanların hücumunun qurbanı olub. Məişət zəminində münaqişə sonradan dramatik əhvalata çevrilib – bundan sonra xuliqanlar polisə atəş açıb və nəticədə, polis rəisinin müavini Orxan Axundzadə ağır yaralanmışdı.
Hazırda hadisənin araşdırılması davam etdirilir.
