Azərbaycan Respublikasının Prezidenti İlham Əliyev cənablarına
Surəti: ​Azərbaycan Respublikasının Baş Prokurorluğu yanında Korrupsiyaya qarşı Mübarizə Baş İdarəsinin rəisi cənab Kamran Əliyevə
Surəti: ​Azərbaycan Respublikası Vergilər Naziri cənab Mikayıl Cabbarova
Surəti: ​Azərbaycan Respublikası İqtisadiyyat naziri cənab Şahin Mustafayevə
Surəti:​ Azərbaycan Respublikasının Dövlət Şəhərsalma və Arxitektura Komitəsinin sədri cənab Samir Nuriyevə,
Abşeron rayonu, Masazır kəndi, “Yeni Bakı”yaşayış kompleksinin sakinləri tərəfindən
MÜRACİƏT.
​Cənab Prezident!
Biz – “Yeni Bakı” yaşayış kompleksinin sakinləri 2010-cu ildən “İlin Dörd Fəsli” MMC-nin (İDF MMC) Abşeron rayonu, Masazır kəndində inşa etdiyi çoxmənzilli (3200 mənzilli) yaşayış kompleksindən mənzillər almışıq. Mənzil aldığımız dövrdən etibarən bir çox problemlərlə qarşılaşmış, onların bir çoxunu müvafiq dövlət qurumlarına müraciətlər əsasında həll edə bilmişik. Bununla belə hazırda iki (2) ən vacib və həyati problemimiz həll olunmadan qalır və "İDF" MMC bu problemləri sakinlərin marağına uyğun deyil, şirkətin marağına uyğun həll etməyə qərar verib. Bunlardan biri sizin bu ilin fevralın 19-da imzaladığı "Bəzi çoxmənzilli binaların istismarına icazə verilməsinin sadələşdirilməsi haqqında" Fərman idi ki, hazırda Şirkət fərmanda nəzərdə tutulan öhdəlikləri sakinlərdən rüşvət yığmaqla "sadələşdirməyə" başlayıb. Sakinlərlə mənzil alqı-satqı müqaviləsində şirkətin adı "İDF" MMC kimi qeyd olunduğu halda, 2019-cu ilin fevralında birdən-birə "İDF-Mənzil Servis” MTK adlı yeni bir qurum cildində peyda olub və faktiki olaraq sakinlərin hüquqlarını kobud və nümayişkaranə şəkildə pozaraq sakinlərin çıxarış alma yolunda böyük bir əngəl yaradıb. Belə ki, 8-10 il əvvəl “İDF” MMC-dən aldığımız mənzillərə aid əlimizdə alqı-satqı müqaviləsi və maliyyə arayışı olduğu halda, Dövlət Əmlak Komitəsinin məsuliyyətsizliyi nəticəsində binalar “İDF” MMC kimi deyil, “İDF-Mənzil Servis” MTK olaraq qeydiyyata alındığına görə əlimizdə olan sənədlər hüquqi qüvvəsini itirib və faktiki olaraq yaşadığımız mənzillərimizə dair əlimizdə heç bir sənədimiz yoxdur. Halbuki binalar “İDF” MMC kimi qeydiyyatdan keçmiş olsaydı, əlimizdəki sənədlər çıxarış almaq üçün yetərli olardı. Qeyd edək ki, Dövlət Əmlak Komitəsi “Yeni Bakı” yaşayış kompleksində yerləşən binaları dövlət reyestrinə qəbul edərkən, tələb olunan sənədlərin içərisində Abşeron rayonu icra hakimiyyətinin binaların istismara qəbul edilməsi Aktını (09.02.2015-ci il tarixli) bilərəkdən nəzərə almamış, həmçinin “Yeni Bakı” y/k-ni“İDF-Mənzil Servis” MTK kimi reyestrə qeydiyyata aldığı zaman adı çəkilən şirkətin üzərinə sakinlərin müvafiq sənədlərlə təmin etmək öhdəliyini qoymamış və bununla da sakinlərin mənzil hüquqlarının pozulmasına birbaşa şərait yaratmışdır. Əlavə olaraq onu da qeyd edək ki, binaların sənədləşdirilməsi ilə bağlı səlahiyyətlər “İDF” MMC-dən alınaraq, “İDF-Mənzil Servis” MTK-ya verilməklə dövlət büdcəsinə hər mənzilə görə ödənilməli olan 2-3 min manat arası vergi (təxminən 8 milyon manat) büdcədən yayınmış oldu.
Hazırda Şirkət çıxarış üçün tələb olunan sənədlərin verilməsinə görə sakinlərdən (1 otaqlı mənzil üçün 150 manat, 2 otaqlı mənzil üçün 225 manat və 3 otaqlı mənzil üçün 300 m) qanunsuz vəsait tələb edir. Bu vəsait tələbinin səbəbini soruşduqda Şirkət rəsmisi ilk öncə bu vəsaitin DƏK-ə ödəniləcəyini (sakinlərə Əmlak Komitəsinə rəsmi ödənmiş 110000 (yüz on min) manatlıq ödəniş qəbzini göstərmişdir. Bu qəbzi qoşma kimi sizə təqdim edirik) bildirmiş, ancaq sonradan bu “səhv”ini düzəldərək “konsaltinq xidmətinə” ödəniləcəyi haqqında məlumat vermişdir. Burada sual ortaya çıxır: 3200 mənzilin hər birinə görə toplanan ortalama məbləğ ümumilikdə 720 000 (yeddi yüz iyirmi min) manat edir ki, Azərbaycanda hansı konsaltinq şirkəti bu məbləğə xidmət göstərir? Bu faktın özü belə “İDF” MMC-nin sakinlərə qarşı dələduzluğunu ortaya qoyur. Onu da qeyd edək ki, Şirkətdən konsaltinq xidməti haqqında məlumat öyrənməyə çalışdığımızda, bunun məxfi informasiya olduğunu bildirirlər.
Əgər konsaltinq şirkəti ilə sakinlərin adından müqavilə bağlanıbsa və bu şirkətə külli miqdarda pul ödənilibsə, MTK üzvlərinin bundan xəbəri olmamalıdır?! Şirkət bununla da kifayətlənməyib sakinlərdən tələb edir ki, Şəhərcikdə qanunsuz idarəetməsini həyata keçirən hazırkı komendantlıqdan “təmizlik arayışı”alsınlar. Belə bir “arayış” isə çıxarış üçün tələb olunan sənədlər siyahısında yoxdur.
Qarşılaşdığımız ikinci ən mühüm problem isə şəhərciyin idarəedilməsi ilə bağlıdır. Belə ki, “İDF” MMC sakinlərin razılığı olmadan təyin etdiyi qanunsuz komendantlıq 2010-cu ildən şəhərcikdə at oynadır. Ən böyük narazılıq isə kommunal xidmətlərin paytaxt qiymətlərindən baha olması (mənzilin hər kv.m. üçün 40 qəpik), şəhərciyin təhlükəsizlik problemi və sakinlərlə normal rəftar edilməməsidir. Belə ki, bu saxta komendantlığın işçiləri dəfələrlə sakinləri təhqir və təhdid edib, onları küçə söyüşləri ilə alçaltmağa çalışıb və bu yolla sakinləri qorxu altında saxlamaq yolunu tutub. Sadəcə bir faktı qeyd etmək kifayətdir ki, şəhərciyin əvvəlki komendantı Ehtiram Yusifov 2019-cu ilin aprel ayının 27-də şəhərcikdə fəaliyyət göstərən 3 maklerə qarşı odlu silahdan istifadə edərək, onları yaralamışdır. Yalnız digər sakinlərin müdaxiləsi nəticəsində o, qətl planını tamamlaya bilməmişdir. Halbuki Ehtiram Yusifov daha əvvəl dəfələrlə sakinlərə və şəhərcikdə fəaliyyət göstərən kiçik sahibkarlara qarşı qanunsuzluqlara əl atmış, hətta gecə saatlarında sakinləri “razborka”ya çağırmaqdan belə çəkinməmişdir. Xatırladaq ki, sözügedən hadisədən sonra Abşeron Rayon Prokurorluğu məlumat yayaraq faktla bağlı Cinayət Məcəlləsinin 29,120.2.4-cü (Xüsusi amansızlıqla qəsdən adam öldürməyə cəhd) maddəsi ilə cinayət işinin başlanıldığını və iş üzrə müvafiq ekspertizalar təyin edildiyini bildirmişdi. Cinayəti törətməkdə şübhəli bilinən Ehtiram Yusifov isə iş üzrə şübhəli şəxs qismində saxlanılmışdı. Məlum cinayət hadisəsindən 5 ay keçməsinə baxmayaraq, həbs-qəti imkan tədbiri seçilmiş Ehtiram Yusifov hansı yollasa 24 sentyabr 2019-cu il tarixində “Yeni Bakı” yaşayış kompleksində yenidən görünməklə sakinləri təşvişə salmış və onların ciddi narahatlığına səbəb olmuşdur.
Bütün bunlara görə hazırda şəhərcikdə böyük bir narazılıq var və sakinlər Azərbaycan qanunvericiliyi ilə hazırda tənzimlənən "Mənzil Mülkiyyətçiləri Müştərək Cəmiyyəti"ni yaratmaqda və idarəetmənin sakinlər tərəfindən həyata keçirilməsində çox israrlıdır. Onu da qeyd edək ki, şəhərcik sakinləri 2016-cı il mayın 10-da şəhərcikdə, 3 saylı binada "Abşeron-1" MMMC-ni təsis ediblər və həmin Cəmiyyət 2018-ci ilədək fəaliyyət göstərib, sakinlər tərəfindən rəğbətlə qarşılanıb. Lakin Şirkətin təzyiqləri ucbatından hazırda Müştərək Cəmiyyət öz fəaliyyətini müvəqqəti dayandırıb.
Xüsusilə qeyd edək ki, bütün bunlar barədə biz başda Abşeron RİH olmaqla, müvafiq dövlət qurumlarına və hüquq-mühafizə orqanlarınadəfələrlə yazılı və şifahi şəkildə məlumat vermişik. Abşeron RİH-in başçısı İradə Gülməmmədova bu problemlər barədə şəxsən məlumatlıdır və biz onunla bir neçə dəfə görüşmüşük. İradə xanım isə vəzifə səlahiyyətlərinə uyğun davranmayaraq, bizim problemimizə laqeydlik göstərmiş və əslində Sizin məlum Fərmanınızın icrasına dırnaqarası yanaşmışdır.
Möhtərəm Prezident,
Sizdən xahiş edirik ki, yuxarıda qeyd etdiyimiz problemlərin həlliüçün müvafiq dövlət qurumlarına göstəriş verəsiniz.
pia.az
