“Cümşüd Nuriyev dünən verdiyi açıqlamada sərsəmləyib. Azərbaycan cəmiyyətində Cümşüd Nuriyev deyəndə hamının ağlına nə gəlir, özü hamıdan yaxşı bilir”.

Bu sözləri “Yeni Sabah”a açıqlamasında Vətəndaş Həmrəyliyi Partiyasının sədrinin müavini Samir Əsədli deyib.

O bildirib ki, Cümşüd Nuriyevin dedikləri sadəcə gülüncdür:

“Cümşüd Nuriyev ağzını açıb, gözünü yumur nə gəldi danışır və özü də öz dediyinə inanır. Amma bilmir ki, onun dediyi sadəcə gülünc ifadə doğurur. Vətəndaş Həmrəyliyi Partiyası 2000-ci ildə keçirilən parlament seçkilərinə namizəd irəli sürəndə, ümumiyyətlə Cümşüd Nuriyevin adı həmin siyahıda olmayıb. O, haradan bu iddiaya gəlib ki, öz adı siyahıda ikincidir? Cümşüd Nuriyev gözünün içinə qədər yalan danışır”.

VHP funksioneri qeyd edib ki, Ramiz Mehdiyevin 2000-ci il partiya siyahısını dəyişdirməsi ilə bağlı iddia həqiqəti əks etdirmir:

“Ramiz Mehdiyev kimdir ki, VHP-nin siyahısını dəyişdirsin? Ramiz Mehdiyev və Sabir Rüstəmxanlının hansı formada düşmən olduğunu bütün Azərbaycan cəmiyyəti bilir. Cümşüd Nuriyev özü də bunu çox yaxşı bilir. Cümşüd Nuriyev ömrü boyu Sabir bəyin yanında işləyib. “Azərbaycan” qəzetindən tutmuş, bir sıra qurumlara qədər. Sadəcə olaraq, Cümşüd Nuriyevin adı gələndə insanların ona münasibətindən, özü utanıb danışmamalıdır”.

Qeyd edək ki, həmin hadisələrlə bağlı “Yeni Sabah”a danışan Cümşüd Nuriyev iddia edir ki, 2000-ci ildə VHP-nin siyahısını sədr Sabir Rüstəmxanlı deyil, Prezident Administrasiyasının (Prezident Aparatı) o zamanki rəhbəri Ramiz Mehdiyev dəyişib. Onun iddiasına görə, Ramiz Mehdiyev qəti şəkildə bildirib ki, Cümşüd Nuriyev və Əsgər Məmmədov qalsa, VHP parlamentdə buraxılmayacaq. Amma Rafael Hüseynov və Fəzail İbrahimliyə ilk üclükdə yer verilsə, partiya proporisonal siyahı üzrə Milli Məclisdə təmsil olunacaq.