“Başa vurduğumuz 2025-ci il təlatümlü və gərgin il olaraq tarixə qovuşdu. Planetimiz nüvə təhdidi ilə üz-üzədir. Köhnə ildən qarşılaşdığımız yeni 2026-cı ilə, təəssüflər olsun ki, ağır miras da qaldı. Ukrayna-Rusiya müharibəsi daha amansız və dağıdıcı xarakter almaqdadır, Yaxın Şərqdə münaqişələr və qarşıdurmalar səngimir. Uzaq Amerika qitəsində hər an yeni silahlı toqquşmalar baş verə bilər”.

Bunu Moderator.az-a açıqlamasında “2026-cı ildə Azərbaycanın və dünyanın siyasi və iqtisadi həyatında hansı yenilikləri gözləyirsiniz?” sualını cavablandırarkən söyləyib.

“Yerləşdiyimiz siyasi coğrafiyada da mürəkkəb vəziyyətdir. Qonşu İranda baş qaldıran rejimə qarşı etirazlar genişlənməkdədir, Ermənistanın daxilində ictimai-siyasi durum da tündləşməkdə davam edir. Gürcüstanda da siyasi sabitlik çox kövrəkdir. Moskvanın postsovet dövlətlərinə basqısı artır. Göründüyü kimi, bu il də sabit, rəvan və sakit il olmayacaq. Bununla belə, gözləntilər də var. İlk növbədə Rusiya Ukrayna müharibəsinin durdurulması istiqamətində artan diplomatik səylər öz müsbət nəticəsini verməlidir. Bu müharibə beynəlxalq münasibətlər sisteminə ciddi təsir göstərən qlobal müharibəyə çevrildiyindən ədalətli həll olunması dünya ictimaiyyətini rahatladar, sülhün və təhlükəsizliyin təmin olunmasında müstəsna rol oynayardı. Bu müharibənin hamılıqla qəbul olunan hüquqa və prinsiplərə əsaslanaraq həlli regionumuz üçün də əhəmiyyət kəsb edir”, -deyə davamında siyasi şərhçi diqqətə çatdırıb.

Əli Orucovun sözlərinə görə, cari ildə Ermənistan-Azərbaycan arasında yekun sülh sazişinin imzalanmasına, Zəngəzur dəhlizinin açılmasına, tranzit nəqliyyat xəttlərinin istifadəyə verilməsinə də ümid edilir:

“Ötən ilin 8 avqustunda Donald Trampın vasitəçiliyi ilə liderlərin imzaladığı sənədlər bunun üçün münbit zəmin hazırlayıb. Regionun əməkdaşlığı və inteqrasiyası üçün geniş imkanlar açıb. Düşünürəm ki, Azərbaycan Avropa İttifaqı ilə münasibətlərdə də normallaşma və inkişaf üçün də perspektivlər qiymətləndiriləcək. Həmçinin ABŞ Azərbaycana qarşı tətbiq etdiyi 907-ci düzəlişi də ləğv edəcək. Azərbaycanın yenə də dünyanın siyasi, mədəni mərkəzlərdən biri olmaq statusunu özündə saxlayacağına da güvənim tamdır. Azərbaycanın xarici siyasətinin bundan sonra uğurlu olması region üçün də faydalıdır. Bu vəzifənin də öhdəsindən xarici siyasət sahəsində məsul olan Hikmət Hacıyevin və Ceyhun Bayramovun prezidentin etimadını cari ildə də doğruldacağına qətiyyən şübhəm yoxdur...”

Siyasi şərhçi hesab edir ki, eyni ümidverici fikirləri Azərbaycan rəhbərliyininiqtisadi komandası haqqında söyləmək mümkün deyil:

“Yeni ilə hökümət qiymət artımı və bahalaşma ilə başladı. Ölkədə sosial-iqtisadi durum pisləşməkdədur. Quru sərhədlərin açılması ölkə vətəndaşlarının ən böyük arzusuna çevrilib. Bu il təxirəsalınmaz məsələlərdən biri də fundamental islahatların həyata keçirilməsidir. Köhnədən qalan və inkişafa əngəl olan strukturlar və paralel orqanlar ləğv edilməli, idarəetmə mobilləşməlidir...

Parlament buraxılmalıdır. Çünki dövrün çağırış və tələblərinə cavab vermir, Ramiz Mehdiyevin adamları oradan da təmizlənməlidir. Daxili problemlərin həlli istiqamətində təxirəsalınmaz effektli tədbirlərin görülməsi qaçınılmazdır.”

“Yekun olaraq qeyd etmək istərdim ki, 2026-cı ildən çox böyük gözləntilər var və sürətlə dəyişən, sabit olmayan dünyada bir dövlət olaraq maraqlarımızın və təhlükəsizliyimizin müdafiəsi üçün ayıqlığımızı və çevikliyimizi itirməməliyik”, - Əli Orucov vurğulayıb.