Bakı sakini Yasin Bayramov əvvəllər Nizami Rayon Məhkəməsində hakim vəzifəsində işləmiş Aygün Abdullayevadan şikayətçidir. Şikayətçi bildirir ki, üzləşdiyi problemlə bağlı müvafiq qurumlara müraciət edib, kömək ala bilməyincə musavat.com-a müraciət edərək, məsələni ictimailəşdirmək qərarına gəlib.
O, şikayətini geniş formada aşağıdakı kimi anladıb: “2006-cı ildə qaynım Rauf Mehdiyev Süleyman oğlu biznes fəaliyyəti ilə məşğul olurdu. İşlərinin düz getməməsi nəticəsində bankrot olub. Daha sonra oğlum Ruzigar Bayramova deyib ki, dostum vəkildir, gəl gedək onun yanına, atanın mənzildən istifadə hüququnun itirilməsinə dair sənəd hazırlayaq. Adı mənə bəlli olmayan vəkil götürüb Nizami Rayon Məhkəməsində saxta sənədlə iddia qaldırıb. Bu sənədə nə mənim yoldaşım Elmira Mehdiyeva imza atıb, nə də digər oğlum. Özüm də həmin ərəfədə Rusiyada olmuşam. Sadəcə olaraq oğlum dayısına aldanıb, ərizə yazıb. Həmin ərizəyə də digər ailə üzvlərim imza atmayıblar. Ancaq buna baxmayaraq onların yerinə sənəddə saxta imza çəkilib. Gətirdiyim sənədlərdən görə bilərsiniz ki, yoldaşımın və oğlumun həqiqi imzaları başqadır. Yuxarıda qeyd etdiyim ərizə 2006-cı ilin 27 fevral tarixində verilib. Məhkəmə həmin ilin martın 6-da işi icraata götürüb. Bu işdən isə yoldaşımın xəbəri olmayıb. Yazılan ərizədə göstərilib ki, guya mən 5 ildən artıqdır ki, Bakıda yaşamıram və harasa naməlum istiqamətə getmişəm, ailəmlə əlaqə saxlamıram. Halbuki, mən hər ay ailəmə pul göndərmişəm ki, bunun da sənədləri var. Bundan başqa da 2003-cü ildə Bakıda şəxsiyyət vəsiqəmi dəyişdirmişəm. Bununla da bağlı əlimdə sənədlər var. Bütün bu faktlar isə Aygün Abdullayevanın sədrliyi ilə keçirilən məhkəmədə nəzərə alınmayıb. Nəticədə Qara Qarayev prospekti, ev 108, mənzil 112 ünvanında olan evim mənim adımdan çıxarılıb və 90 min manata satılıb. Məhkəməyə guya qonşularımdan da bəziləri şahid qismində qatılıb, hələ akt da yazıblar. Guya 3 qonşu akt hazırlayıblar ki, mən 5 ildir ki, qeyd olunan mənzildə yaşamıram. Həmin qonşulardan biri Orxan Bayramovla söhbətim zamanı o, bildirib ki, ümumiyyətlə, bu işlə bağlı məhkəmədə olmayıb və hər hansı bir ifadə də verməyib. O.Bayramov həmçinin qeyd edib ki, akta çəkilən imza da ona aid deyil. Ümumiyyətlə, məhkəmədə heç bir şahid iştirak etməyib. Bundan əlavə digər oğlum Ziyadəli Bayramov da məhkəmənin keçirildiyi vaxt Gürcüstanda olub. Ancaq onun da adından ərizə yazılıb, qol çəkilib. Hazırda da evsiz qalmışam. İşlə bağlı apellyasiya şikayəti vermişəm. Apellyasiya Məhkəməsində dedim ki, burada ərizə saxtakarlığı var. Mənə dedilər ki, qarşı tərəf belə demir, axı... Cavab verdim ki, Mülki Prosessual Məcəllənin 149-cu maddəsinə əsasən kimin adına iddia ərizəsi verilirsə, o adamlar və ya səlahiyyətli nümayəndələri ərizəyə imza çəkməyibsə, ərizə qəbul edilmir. Rusiyadan ötən ilin 7-ci ayından gəlmişəm. Evi isə adımdan çıxarıb, 2009-cu ildə satıblar. Bakıya ötən il gəlmişəm. Ailəm bir neçə il Rusiyada mənim yanımda yaşayıb. Hazırda isə qaynımın evi satdığı pulla aldığı 1 otaqlı mənzildə yaşayırlar”.
Yuxarıda adıçəkilən Orxan Bayramovla da əlaqə saxladıq. O, “Yeni Müsavat”a bildirdi ki, Yasin Bayramov yalan danışır: “Onun oğlu Ruzi mənim sinif yoldaşımdır, həm də bir məhəllədə qalırıq. Mən 11-ci sinifdən Yasin kişini görməmişəm. Heç o, övladları Ruzinin, Ziyanın toyuna da gəlməyib. Bu insanı yalnız ötən il görmüşəm. Ona görə də mən həqiqətə qol çəkmişəm. Çox səhv edib mənim adımdan danışır. Dostumdu, əzizimdi qol çəkmişəm. Qol çəkən 3-4 qonşudan da biri mənəm. Deyəsən onun başında problem var. Getsin ailəsi ilə problemini həll etsin. Bu günlərdə mənə bu barədə danışdı. Dedim ki, hadisə çoxdan olub, yadımda deyil. Sonra yadıma düşdü ki, bəli, belə bir hal oldu və qol çəkmişəm. Ondan sonra da Yasin kişini görmədim ki, deyəm ki, bəli, qol çəkmişəm. Ona qətiyyətlə deməmişəm ki, kağıza qol çəkməmişəm. Dedim ki, yadımda deyil, fikirləşib deyərəm. Sonra da onu görmədim. Bir daha deyirəm ki, qol çəkmişəm və burada qeyri-qanuni heç nə yoxdur. Yasin kişini bu günlərdə görəndə heç tanımadım. Sonra tanışlıq verdi, yadıma düşdü. Hadisə 2006-cı ildə olub. Əhəmiyyətli bir şey deyil deyə, o, məndən qəfil soruşan vaxtı yadıma sala bilmədim. Sonradan yadıma düşdü ki, Ruzi bir neçə nəfər qonşuya qol çəkdirmişdi, biri də mən idim”.
Daha sonra şikayətçinin xanımı Elmira Bayramova ilə əlaqə saxladıq. O da söylədi ki, 17 ildir, yoldaşı burada yaşamır: “17 ildir ki, o, burada yaşamır. 2001-ci ildən 2 oğlanı üstümə atıb, gedib. İndi şikayət etdiyi qaynı onun övladlarına baxıb. Heç kim kiminsə yerinə qol çəkməyib. Hər kəs öz yerinə imza atıb. İki oğlumun toyunu etdik, ev satıldı, pul banka qoyuldu. Evi də atam onun adına almışdı. Hazırda işimiz apellyasiya məhkəməsindədir. Deyir ki, guya 23 yaşında oğlum hakimi aldadıb. 23 yaşlı adam hakimi aldadırsa, o zaman bu nə hakimdir? Sadəcə olaraq Yasin saxtakarlıq edir. Hazırda birlikdə qalmırıq. 17 il sonra Rusiyadan qayıdıb gəldi, mən də evə qoymadım”.
Yuxarıda adıçəkilən Ruzigar Bayramov da “Yeni Müsavat”a bildirdi ki, atasının danışdığı bütün fikirlər yalandır: “Boş söhbətlərdir. O adam 17 ildir ki, burada deyil və bizi də görməyib. Nə rüşvət vermişəm, nə də başqa bir iş görmüşük. Qonşuların da imzası ilə məhkəmədə iştirak etmişik. Ev özəlləşməmişdi. Evi 2006-cı ildə özəlləşdirib, 2009-cu ildə isə satmışıq. Alnımız açıq, üzümüz ağdır. Dayımın adın çəkir. Bizə baxan elə dayım olub”.
