Keçmişdə deyərdilər ki, kabuslar daha çox meşələrdə, qəsrlərdə və insan ayağı dəyməyən yerlərdə olurlar. İndi isə onları ticarət mərkəzlərində, parklarda, hətta mənzil tikinti kooperativlərinin inşa etdikləri yüksək mərtəbəli yeni yaşayış binalarının həndəvərində də görmək olur. Yeni yaşayış binalarında mənzil almaq istəyən vətəndaşların diqqətinə! Qorxmayasınız, qorxsanız şəkər ola bilərsiniz. Tamamilə yaşayış tərziniz dəyişər, bax beləcə. Özümə rəva bilmədiklərimi sizlərədə rəva bilmirəm...
Söhbət nədən və kimdən gedir? Hansı kabusdan gedir? Səbirli olun, axıra kimi oxuyun. Bildirirəm ki, düz 23 il bundan qabaq, 1998-ci ildə Bakı şəhəri Suraxanı Rayon İcra Hakimiyyəti Aparatına ərizə ilə müraciət etdim. Xahiş etdim ki, ailəmin maddi təminatını az da olsa yaxşılaşdırmaq, alqı-satqı ilə (ticarətlə) məşğul olmaq məqsədi üçün mənə Yeni Günəşli “D” yaşayış sahəsində ticarət cərgəsində mağaza tikmək üçün yer ayırasınız. Mənə Suraxanı Rayon İcra Hakimiyyəti başçısının 23.09.1998-ci il tarixli 1637 saylı sərəncamı ilə qeyd etdiyim ünvanda mağazanın tikintisinə icazə verilmiş və yer ayrılmışdır.
1998-ci ilin oktyabr ayında yenidən Suraxanı Rayon İcra Hakimiyyəti Aparatına müraciət etdim. Bildirdim ki, əhaliyə daha keyfiyyətli ticarət xidməti göstərmək və mal ehtiyatlarını saxlamaq məqsədi ilə mağazanın sahəsinin genişləndirilməsinə icazə verin. Suraxanı Rayon İcra Hakimiyyətinin başçısı 23.09.1998-ci il tarixli 1667-saylı sərəncamına dəyişiklik edib mağazanın sahəsinin genişlənməsinə və rekonstruksiya olunmasına dair 29.10.1998-ci il tarixli 1877 saylı Sərancam vermişdir. Sərəncamlar əsasında icazəsi verilmiş mağazanı tikib başa çatdırdıqdan sonra, 23.03.2000-ci il tarixdə aidiyyəti üzrə müraciət etdim, Dövlət Tikinti İnventarlaşdırma və Mülkiyyət Hüquqlarının Qeydiyyatı İdarəsi tərəfindən mağazanın mövcudluğunu təsdiq edən (kimlik) Texniki Pasportu verilmişdir.
Uzun sözün qısası, 23 ildən sonra “Ana Kür” MTK-nın sədri Vahid Abdullayev və onun oğlanları Vüqar və Vüsal Abdullayev gecənin birində əmlakımızı zorla əlimizdən alır, zəbt edir, ailəmi-uşaqlarımı və məni öldürtdürəcəyi ilə hədələyir.
23 ildən sonra məni əmlak hüquqlarımdan məhrum edir və bir ailəni ac qoyurlar, çörəyini kəsirlər. Bu adamların qanunsuz hərəkətləri ilə bağlı prezident
İlham Əliyevə, birinci vitse-prezident Mehriban xanım Əliyevaya, Dövlət Təhlükəsizlik Xidmətinin rəisi Əli Nağıyevə, daxili işlər naziri Vilayət Eyvazova və baş prokuror Kamran Əliyevə çoxlu sayda şikayətlər etmişəm və üzləşdiyimiz qanunsuzluqları internet kanallarında, KİV-də ictimailəşdirmişik.
İstədim bu şəxslərin kimliyi barəsində özüm axtarış edim, görüm bunlar kimlərdir. Ara adamlarının dediklərinə görə, bunların arxasında hansısa deputat və hansısa iri məmur durmuşdur. Adamlar iri məmur dedikdə onun boy-buxununu nəzərdə tutmurlar, onu rüşvətxor, korrupsioner məmurun yekəsi kimi nəzərdə tuturlar. Nəhayət, axtarışımı davam etdirməkdəyəm. Ancaq deyirlər ki, indi keçmişdəki kimi deyil. Kabusları meşələrdən, qəsrlərdən, insanların əl ayağı dəyməyən yerlərdən ticarət mərkəzlərinə, parklara, mənzil tikinti koorporativlərinə və Bakı şəhərinin mərkəzinə gətirib çıxaranlar korrupsioner məmurlardır. Və qanunvericilik hakimiyyətində olan qanundan başı çıxmayan, ona görə də qanunsuz hərəkətlərə əl atan biçarə millətin vəkilləridirlər. Bu əsaslara görə də adıçəkilən şəxslərin qanunsuz hərəkətlərinin qarşısını ala bilmirlər.
Bir az da araşdırma apardıqda məlum oldu ki, bu adamlar tərəfindən əmlakları əllərindən zorla alınmış, onların hərbə-zorbalarına, hədə-qorxularına məruz qalmış təkcə biz deyilik, onlar bizim kimi 10-larla , 100-lərlə insanların əmlakını zorla əllərindən almışlar. Maraqlısı odur ki, bu kəslərin barəsində hələ “Ədalət” qəzetinin 21.11.2019-cu il tarixli sayında Suraxanı rayonu, Yeni Günəşli “D” yaşayış massivində 13 nömrəli binada yaşayan bu ata-oğullar tərəfindən əmlakları əllərindən zorla alınmış, zəbt edilmiş, zərər çəkmiş 22 nəfər sakin bir araya gəlib 144 ailənin adından hüquq-mühafizə orqanlarına şikayət etdiklərini bildirmişlər. “Ədalət qəzetində “Ana Kür” MTK-nın sədri qanunları saya salmır” başlıqlı material dərc edilmişdir. Bundan başqa, “Ədalət” qəzetinin 07.01.2020-ci il tarixli 31263 saylı tirajında sözügedən massivin 30-a yaxın sakininin şikayəti əsasında “”Ana Kür” MTK qanunları pozmaqda davam edir” başlığı altında material dərc edilmişdir. Həmçinin, ata və oğulların qanunsuz hərəkətləri barəsində “Ədalət” qəzetinin 06.05.2021-ci il tarixli tirajında “”Abad etmək istədilər, bərbad oldu” başlıqlı material dərc edilmişdir. İnsanların əmlaklarını zor tətbiq etməklə, hədə -qorxu gəlməklə əllərindən alan, qanunları saya salmayan, qanunları pozmaqda davam edən, abad etmək əvəzinə bərbad edən bu ata və oğulların arxasında duran məmur və deputat görəsən kimlərdir?
Diqqətinizi baş vermiş başqa bir olaya cəlb etmək istəyirəm. Baxın, vətəndaş Abbasov Rövşən Qəşəm oğlu bildirir ki, o da “Ana Kür” MTK-nın sədri Vahid Abdullayevin və onun oğlanları Vüqar və Vüsal Abdullayevlərin hədə-qorxularına, hərbə-zorbalarına məruz qalmışlar. Ata və oğulları onun da əmlakını zorla əlindən almışlar. Abbasov Rövşən ortaya rəsmi sənəd qoyur ki, 20 ildən artıqdır ki, ona məxsus əraziyə qanuni elektrik enerjisi, su çəkdirmişdir, istifadə etdiyi enerjinin və suyun sərfiyyatına görə hər ay işıq pulu, su pulu ödəmişdir. Abbasov Rövşən ortaya rəsmi sənəd qoyur ki, 20 ildən artıqdır ki, sözügedən əmlakına görə Suraxanı Rayon Qaraçuxur Bələdiyyəsinə əmlak vergisi və əmlak haqqı ödəmişdir. Necə olur ki, 20 ildən sonra gecənin birində bu ata və oğulları tərəfindən əmlakım əlimdən alınır, yerlə yeksan edilir, haqqımı tələb edəndə, haqsızlığa dözməyib səsimi çıxardanda isə məni öldürtdürəcəkləri, ya da tutduracaqları ilə hədələyirlər. Abbasov Rövşən öz növbəsində onu da qeyd edir ki, bu ata və oğulları tərəfindən haqqı tapdalanan, zorla əmlakları əlindən alınan, şiddətə məruz qalan təkcə o deyil, belələri 10-larla, 100-lərlədir.
Bundan başqa, Səmədov Zaur Məmməd oğlu və 70 yaşlı ağbirçək Abbasova Simuzər Hüseyn qızı da eynilə mənim kimi “Ana Kür” MTK-nın sədri Vahid Abdullayevin hərbə-zorbasına tuş gəlmişlər, əmlakları əllərindən alınmışdır və əmlak hüquqlarından məhrum edilmişlər. Bu ata və oğulları deyir ki, gedin kimə deyirsiniz deyin, hara gedirsiniz gedin, o yol, o da siz… Ancaq biz düşünürük ki, qanunlarımızı pozanlar gec-tez qanun qarşısında cavab verəcək, cəzalandırılacaqlar. Odur ki, bu şəxslərin də məsuliyyətdən kənarda qalmayacaqlarına inanırıq. İnanırıq ki, aidiyyatı qurumlar bu yazıdan sonra məsələ ilə bağlı müvafiq ölçü götürəcəklər.
Sonda qeyd edək ki, biz – Abdullayev Böyükağa Abdulla oğlu, Abbasov Rövşən Qəşəm oğlu, Səmədov Zaur Məmməd oğlu və 70 yaşlı ağbirçək Abbasova Simuzər Hüseyin qızı ölkə başçısı İlham Əliyevdən və birinci vitse-prezident Mehriban xanım Əliyevadan köməklik istəyirik. Ümid edirik ki, məhz onların yardımı ilə üzləşdiyimiz haqsızlıqlar, problemlər aradan qaldırılacaq, ədalət bərqərar olacaq.
Böyükağa Abdullayev
Rövşən Abbasov
Zaur Səmədov
Simuzər Abbasova //hurriyyet.az//
