Azərbaycanda ədəbiyyat üzrə yeni dövlət mükafatı- Azərbaycan Kitab Mükafatı 2026-cı ildə elan ediləcək. Mükafatın məbləği 50 min manat olacaq və Prezident Fərmanı ilə təsdiqlənəcək. Laureata bir nəfər müəyyənləşəcək, qalibə həm pul mükafatı, həm diplom və döş nişanı təqdim olunacaq.
Mükafatın təsis edilməsi ədəbiyyat ictimaiyyətində müzakirə olunur, qalibin seçimi, müsabiqənin ədalətliliyi və cəmiyyət üçün əhəmiyyəti barədə müxtəlif fikirlər səslənir.
Yazıçı Kəramət Böyükçöl mövzu ilə bağlı Sherg.az-a danışıb:
"Məni dəvət etdilər, iştirak etdim. Mədəniyyət Nazirliyinin nümayəndələrinə, müavinlərinə, şöbə müdələrinə fikirlərimi dedim. Ədəbiyyatla bağlı bu mükafat, əgər dövlətin təsis elədiyi mükafatdırsa, "bir sıfır geridən başlayır" deməkdir. Çünki ədəbiyyat azad bir sahədir. İndi o mükafat layiqli bir adama veriləcək-verilməyəcək bunu bilmək olmaz.
Aydın məsələdir ki, orada senzuralar olacaq, siyasi məsələlərə yer verilən hansısa bir əsər kənarlaşdırılacaq. Ədəbiyyat mükafatı mənim o qədər də maraq dairəmdə deyil. Birinci yerin mükafat pulunu nə qədər yüksək eləsələr belə, cəmiyyət üçün onu cazibədər edə bilməyəcəklər. Sağ olsunlar, təşəbbüs göstərirlər, nəsə eləmək istəyirlər, amma orada cəmiyyətin, azad ruhlu insanların ciddi bir gözləntiləri olmayacaq".
Kəramət Böyükçöl, Şahbaz Xudoğlunun "Kitab mükafatına öz qohumlarını, yaxınlarını, tanışlarını çəkəcəklər" fikrinə də münasibət bildirib:
"Vallah Şahbaz Xuduoğlu nə deyir-demir, bilmirəm. Azərbaycanda Şahbazdan çox qohum-əqrəbası olan adamı yoxdur. Qohum-əqrəba söhbəti həryərdə var. İndi Şahbaz Xuduoğluna Mədəniyyət Nazirliyində yer verməyiblər, araları dəyib. İndi də o nazirliyin hansısa bir işini, fikrini qəbul eləməyib, tənqidi yanaşır. Mən bunu Şahbaz Xuduoğlunun ədaləti kimi qəbul etmirəm. O özünün şəxsi maraqlarına uyğun olmayanda elə danışır. Sabah münasibətlər düzələndə də, durub başqa cür danışacaq. Amma bütövlükdə, Mədəniyyət Nazirliyinin ədəbiyyat sahəsində sərgilərlə bağlı gördüyü işləri palçığın, bataqlığın içində cüzi müsbət addımlar kimi qimətləndirmək olar.
Azərbaycan dövlətini tanıyıram, onun şərtlərini bilirəm. Ona görə deyirəm ki, inanmıram cəmiyyət tərəfindən o qədər cazibədar qəbul edilsin. İndi Yazıçılar Birliyinin ətrafında, Mədəniyyət Nazirliyinin öz ətrafında o qədər gənclər, yazarlar var. Onların arasından bir nəfər seçib mükafatı ona verəcəklər. "Azərbaycanda yəni elə bir talantlı, dəhşətli dərəcədə, aşıb-daşan istedadı olan bir adam var ki, biz onu görmürük?", yoxsa onu Mədəniyyət Nazirliyinin tapıb, bizə verəcəyi də maraqlıdır. İndi olanımız budur - "Mıa da şükür".
