Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi dekabrın 18-də davam etdirilib. Bakı Hərbi Məhkəməsində keçirilən məhkəmə iclasında dövlət ittihamını müdafiə edən prokuror Ruben Vardanyanın ömürlük azadlıqdan məhrum edilməsini təklif edib.
Xatırladaq ki, Ruben Vardanyan Azərbaycan Respublikası CM-in 100.1, 100.2 (təcavüzkar müharibəni planlaşdırma, hazırlama, başlama və aparma), 107 (əhalini deportasiya etmə və məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrum etmə), 113 (işgəncə), 114.1 (muzdluluq), 115.2 (müharibə qanunlarını və adətlərini pozma), 116.0.1, 116.0.2, 116.0.10, 116.0.11, 116.0.16, 116.0.18 (silahlı münaqişə zamanı beynəlxalq humanitar hüquq normalarını pozma), 120.2.1, 120.2.3, 120.2.4, 120.2.7, 120.2.11, 120.2.12 (qəsdən adam öldürmə), 29,120.2.1, 29,120.2.3, 29,120.2.4, 29,120.2.7, 29,120.2.11, 29,120.2.12 (qəsdən adam öldürməyə cəhd), 192.3.1 (qanunsuz sahibkarlıq), 214.2.1, 214.2.3, 214.2.4 (terrorçuluq), 214-1 (terrorçuluğu maliyyələşdirmə), 218.1, 218.2 (cinayətkar birlik yaratma), 228.3 (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1.2, 270-1.4 (aviasiya təhlükəsizliyinə təhdid yaradan əməllər), 278.1 (hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə), 279.1, 279.2, 279.3 (qanunvericiliklə nəzərdə tutulmayan silahlı birləşmələri və ya qrupları yaratma) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunur.
Milli Məclisin deputatı Hikmət Babaoğlu Bizimyol.info xəbər portalına açıqlamasında bildirib ki, Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq və terrorçuluğun maliyyələşdirilməsi kimi maddələri ilə ittiham olunan Ruben Vardanyan ömürlük həbs cəzasına məhkum edilə bilər.
Deputatın fikrincə, Ruben Vardanyanın ömürlük həbs cəzasına məhkum edilməsi çox ədalətli qərar olar: “Ruben Vardanyanın fəaliyyətində bütün bunlarla bərabər sanksiyalaşdırılmamış cinayətlər də var. Elə mənəvi hərəkətlər var ki, bunlar hüquqda öz əksini tapmasa da, mənəvi cinayət hesab olunur. Biz onun Azərbaycan ərazisinə qanunsuz olaraq gəlib, mənəvi baxımdan Azərbaycan xalqını, onun dəyərlərini təhdid edən aqressiv çıxışlarını eşitmişik. Azərbaycan xalqına meydan oxumalarını görmüşük, Azərbaycan tarixini saxtalaşdırmaq cəhdlərini görmüşük. Azərbaycan xalqı əcdadımızın əkdiyi yüzilliklərlə tarixi olan bir çinarın kölgəsində dayanı, yəni bizim kölgəmizdə dayanıb bizə meydan oxuyub. Bütün bunların, çoxsaylı mənəvi cinayətlərin hüquqda qarşılıqlı sanksiyası olmadığına görə sadaladığımız maddələr üzrə o ittiham edilməyib. Ona görə mən düşünürəm ki, əgər bunları da Ruben Vardanyanın hərəkətlərinin üstünə gəlsək, əlbəttə, tamamilə haqq edir ki, ömürlük həbs cəzasına məhkum edilsin. Çünki Azərbaycanda ondan daha ağır cəza Cinayət Məcəlləsində nəzərdə tutulmur”.
Ruben Vardanyan və digərləri Ermənistana qaytarıla bilərmi?
Hikmət Babaoğlu qeyd edib ki, Ruben Vardanyanın Ermənistana və ya üçüncü başqa bir ölkəyə verilməsi onun əfv edilməsi olardı ki, bu da mümkün deyil: “Belə bir addım Ruben Vardanyandan sonrakı “ruben vardanyanları” Azərbaycana qarşı cinayət əməlləri törətməyə təşviq edərdi.
Cinayət çox qorxulu bir xəstəlikdir. O, cəzasızlıq mühitində daha tez yayılır. Buna görə də heç bir cinayət cəzasız qalmamalıdır”.
