"Bəzən Güney Azərbaycan Milli Hərəkatı barədə bədbin fikirlər səsləndirirlər".

Bu sözləri "Cebheinfo.az"-a açıqlamasında Güney Azərbaycan üzrə araşdırmaçı jurnalist Elman Cəfərli deyib.

O bildirib ki, pessimist fikirlər əsassızdır:

"Reallıq budur ki, ötən əsrin 90-cı illərinin ortalarından başlanmış Güney Azərbaycan Milli Hərəkatı xeyli məsafə qət edib və bir sıra hədəflərinə də çatıb. Bu gün İranda Azərbaycan dilində məktəblər olmasa da, bədbinliyə əsas yoxdur. İranda etnik azlıqlardan yalnız ermənilərin ana dilində məktəbləri və qəzet-jurnalı var.

İranın azərbaycanlı Prezidenti Məsud Pezeşkian vəd versə də, türk dilində mətkəblər açılmadı. Amma bu o demək deyil ki, İranda türk dili ölməkdə olan dildir. Mən belə düşünmürəm".

Onun sözlərinə görə, indi hansısa dildə klassik formatda işləyən televizyaya, qəzet və jurnala ehtiyac yoxdur:

"İndi sosial şəbəkələr dövrüdür. Müşahidələr göstərir ki, İran türkləri "Instagram", "Telegram", "TikTok" kimi sosial şəbəkələrdə çox fəaldırlar. Azərbaycan dilində yumoristik vaynlar çəkib, paylaşırlar. Çoxunun fon musiqisi ya türk, ya da Azərbaycan musiqiləri olur. Onlar latın qrafikalı əlifbalı ilə yazıb-oxuya bilirlər.

Güney Azərbaycanda işlənən türkcə Türkiyə türkcəsi və Azərbaycan türkcəsinin təsiri ilə xeyli sadələşib, fars kəlmələrindən arınıb. İndi soydaşlarımız daha anlaşıqlı türkcədə danışır. Güney Azərbaycanda aşıqlar, xanəndələr var ki, el-el, oba-oba gəzib türk dilində mahnılar oxuyurlar. Onlar dilimizin könüllü təbliğatçılarıdır. Onların sayı minlərlədir".

Elman Cəfərli qeyd edib ki, bu gün Güney Azərbaycan mərkəzi Təbrizdə insanlar ana dilində danışırlar:

"Küçədə, bazarda kimsə cürət edib fars dilində danışa bilmir. Hesab edirəm ki, bu, bizim uğurumuzdur. İran son 30 ildə xomeyniçiliyin Azərbaycan Respublikasında yayılmasına milyonlar xərclədi, gücü 2-3 meyxanaçı, rövzəxan yetişdirməyə çatdı. Biz isə 1 manat xərcləmədən ana dili könüllülərindən ibarət böyük bir ordu yaratdıq".

O vurğulayıb ki, son illər ana dilində mükəmməl danışan, amma mahiyyətcə fars şovinizminin saqqızını çeynəyən adamların ortaya çıxıb:

"Onlardan biri Mənuçöhr Cavanşirdir. Quzeydə onu "Güntay" kimi tanıyırlar. Təəssüf edirəm ki, bu qədər istedadlı, intellektual biri olan "Güntay"ın zərrə qədər milli hissi yoxdur. O, az qala İranda türk dilinin qadağan edilməsinə görə Azərbaycan Respublikasını günahlandıra. Diqqət etmişəm əsas hədəfi Təbriz və türk tarixidir.

Onun danışdıqlarından belə çıxır ki, fars dili və mədəniyyəti olmasaydı türklər “əriyib” yox olacaqdı. Guya bizi ərəb asimilyasiyasından fars qələmi, şüubiyyə hərəkatı xilas edib. O, Təbrizi fars şovinizminin qalası hesab edir. Guya fars şovinizminin təbliğ edənlərin hamısı Təbrizdən çıxıbmış".

E.Cəfərli düşünür ki, bütün bunlar bilərəkdən danışılan sözlərdir:

"O, Milli Hərəkata nifaq toxumu səpmək, ruh düşkünlüyü yaratmaq istəyir. Təbrizi bilərəkdən hədəfə alır. Bir-iki satqın, manqurt ziyalıya görə milli ruhumuzun paytaxtını hədəf almaq doğru deyil. Onun kimilərinin məqsədi irançılığa xidmətdir. Biz heç bir dövlətin daxilini işlərinə qarışmırıq.

Lakin bir ölkədə sayı 40 milyona çatan bir etnosun ana dili qadağan olunubsa, o problem artıq daxili iş deyil. Biz bu bəşəri cinayətə mane olacağıq. Güney Azərbaycan türklərinin asimilyasiya siyasətini durdurmuşuq, ana dilinə azadlıq da qazanacağıq".