"Bu gün dünyada ən çox müzakirə olunan məsələ ABŞ-ın Venesuelaya qarşı 4 saatlıq əməliyyatı və Madurunun öz yataq otağından oğurlanaraq ABŞ-a gətirilməsidir..." "DİA-AZ" xəbər verir ki, bunu özünün sosial şəbəkə hesabında yazan ReAL Partiyasının sədri Natiq Cəfərli olduqca maraqlı məqamlara toxunub.
Cəfərli qeyd edib: "Artıq heç kimdə şübhə yoxdur ki, Maduronu öz yaxın ətrafı satıb, daxildən ciddi dəstək olmasaydı, ABŞ-ın bir nəfər əsgərinin burnunun belə qanamadan əməliyyat keçirməsi, Maduronu evində-yatağında həbs edib, ABŞ-a gətirməsi mümkün olmazdı.
Bu gün baş verənləri anlamaq üçün 50 il keçmişə qayıtmaq lazımdır, təməl ordadır, amma, qırılma nöqtəsinin Çavesin varis planında yarandığı üzə çıxır.
Venesuelanın virse-prezidenti, dünəndən etibarən Venesuelanın Konstitusiya Məhkəməsi tərəfindən bu ölkənin qanuni və faktiki rəhbəri elan edilən Delcy Rodríguez, məncə, bütün bu hekayənin əsas aktryoru, doğma qardaşı Jorge Rodríguez isə baş rejissorudur.
1969-cu ildə Venesuelada “Liga Socialista” adlı hərakat yaranır. Bu hərəkatın təsisçisi və rəhbəri Venesuelanın varlı təbəqəsindən çıxan Antonio Rodríguez oldu. Antonio Rodríguezin iki övladı vardı – qızı Delcy, oğlu Jorge.
1976-cı ildə Antonio Rodríguez həbs olunur və istintaq zamanı müammalı şəkildə ölür. Amma, ailəsi varlı olduğundan həyat yoldaşı hər iki uşağa yaxşı təhsil verməyi bacarır – oğlu Jorge həkim, qızı Delcy hüquqşünas olur (əmək hüququ), Delcy bir müddət Fransada yaşayır, orada təhsil alıb Venesuelaya dönür.
Uqo Çaves hakimiyyətə gələndən sonra qardaş-bacıya yaxşı vəzifələr verir, hamı gözləyirdi ki, öz varisi kimi Jorge Rodríguezi elan edəcək, o zamanlar Jorge vitse-prezident idi – amma, Çaves düşündü ki, Jorgenin xarizması azdır və ona görə də, keçmiş avtobus sürücüsü, odlu-alovlu çıxışları ilə seçilən, həmkarlar lideri olan Maduronu öz varisi elan etdi.
Maduro Rodríguez klanının gücünü bilirdi deyə, bacını vitse-prezident, qardaşı isə Karakasın meri, parlamentin sədri kimi yüksək vəzifələrə təyin etməyə məcbur oldu. Amma, görünən odur ki, bacı-qardaş gözləməkdən bezdilər, Maduronun xoşluqla getməyəcəyini anladılar, çox güman, ABŞ-dan tam zəmanət aldılar ki, Nobel almış müxalifət lideri ölkəyə gəlməyəcək, hakimiyyət bu klana keçəcək, buna görə də, ABŞ-a daxildən ciddi yardım etdilər və nəhayət ki, klan, Çavesin və Maduronun onlara qısqanc münasibətinin qısasını almağa nail oldu, və ya buna çox yaxınlaşdı.
Tarixən müxtəlif ölkələrdə “taxt oyunlarını”, inqilab, xaql üsyanı, bəzən də, güclü ölkənin unikal əməliyyatı kimi təqdim ediblər..."
