"Mən 24 mart 2025-ci il tarixində Tap.az platforması vasitəsilə 28 May metrosu yaxınlığındakı elektronika mağazasından iPhone 15 markalı telefon sifariş etmişəm. Telefonun qiyməti əvvəlcə 1400 AZN göstərilsə də, mağazada mənə 1430 AZN deyildi. Razılaşma nəticəsində 1420 AZN ödəyərək cihazı əldə etdim..." "DİA-AZ" xəbər verir ki, bu barədə Əli Nağı adlı sosial şəbəkə istifadəçisi etiraz dolu müraciətində qeyd edir.

Narazı vətəndaş daha sonra başına gələnləri belə nəql edir: "Cihazı aldıqdan sonra zəmanət verildi, lakin evdə cihazı yoxlayarkən məlum oldu ki, cihaz *kreditlə alınmış və başqa şəxsin mülkiyyətindədir*. Telefonun qutusunu açmamışdım, zədələməmişdim. Dərhal mağazaya müraciət etdim və tələb etdim ki, ya cihaz dəyişdirilsin, ya da pul geri qaytarılsın. Mənə bildirdilər ki, cihaz sistemdən çıxarılacaq və ya geri alınıb pul qaytarılacaq.

02 aprel tarixində cihazı mağazaya qaytardım – telefon və zəmanət sənədi ilə birlikdə. Lakin nə cihaz geri verildi, nə də ödənilən məbləğ qaytarıldı. Hazırda mən həm maddi ziyana uğramışam, həm də aldatma ilə üzləşmişəm.

*mənə dəymiş ziyanın ödənilməsini* və məsuliyyət daşıyan şəxslər barəsində *qanuni tədbir görülməsini* xahiş edirəm..."