Təhsildə Keyfiyyət Təminatı Agentliyi rəhbəri Tural Əhmədov xaricdə təhsil imkanları barədə danışarkən qeyd edib ki, “özünə hörmət edən universitet imtahansız tələbə qəbul etmir”. "DİA-AZ" xəbər verir ki, onun bu fikri geniş müzakirələrə, daha dəqiqi etirazlara səbəb olub. Sosial şəbəkələrdə müşahidə olunan müzakirələrin xəttindən də aydın görünür ki, Tural Əhmədov əslində bu açıqlaması ilə təmsil etdiyi quruma KEYFİYYƏTSİZ bir rəhbər olduğunu da təsdiqləmiş oldu.
Bu məsələyə reaksiya verənlərdən biri də tanınmış jurnalist, ictimai-siyasi fəal Fərid Şahbazlı olduqca maraqlı mövqeyi ilə diqqətə gəlib. "DİA-AZ" olaraq Şahbazlının açıqlamasını təqdim edirik: "Hər şeydən əvvəl onun ritorikası həm kobud, həm də məişət səviyyəsindədir, eyni zamanda məmur etikasına uyğun gəlmir. Bu minlərlə tələbənin təhsilini yumşaq desək, aşağılamaqdır.
Bir az dərinə getsək, bu açıqlama təhsil sahəsində dövlətlərarası münasibətlərə də ciddi zərbə vura bilər. Çünki başda qardaş ölkə Türkiyənin nüfuzlu dövlət universitetləri olmaqla, dünyanın nüfuzlu ali məktəbləri tələbə qəbulunda bu sistemdən faydalanır.
Daha da önəmlisi Tural Əhmədov bu yanaşması ilə Azərbaycan təhsilinin və məktəblərin verdiyi attestat qiymətlərini şübhə altına salır, onu akademik meyar, keyfiyyət göstəricisi kimi görmür və formal olduğuna diqqət çəkir.
Təhsildə keyfiyyət şübhəsiz zəruridir, lakin yalnız imtahan sistemi ilə ölçülmür.
Qeyd etmək vacibdir ki, Tural Əhmədov "imtahansız" qəbul dedikdə attestatla qəbulu nəzərdə tutur.
Attestatla qəbul dedikdə isə attestat balı ilə qəbul başa düşülməlidir və bu bir akademik meyardır.
Xatırlatmaq lazımdır ki, bu gün Azərbaycanın əksər dövlət universitetləri xarici tələbələri məhz imtahansız, yalnız attestat balına əsaslanaraq qəbul edir və bu barədə saytlarında açıq məlumat təqdim edirlər.
Dünyada bir çox nüfuzlu universitetlər də xarici tələbələri attestat balına əsaslanaraq qəbul edirlər. Məsələn, Harvard Universiteti bəzi proqramlarda “standardized test-optional” siyasəti tətbiq edərək, tələbələrdən yalnız orta məktəb nəticələrini nəzərə alır.
University of Oxford isə A-Level və ya digər ekvivalent sertifikatlarla qəbul prosesi aparır.
Sorbonne Universitetində isə xarici tələbələrin qəbulunda orta məktəb diplomları və akademik göstəricilər əsas götürülür.
Bu yanaşma göstərir ki, attestat balı ilə qəbul qlobal akademik standartdır.
Həmçinin, istənilən xarici universitetə qəbulda ən azı dil imtahanı və ya dil biliklərini təsdiq edən sənəd tələb olunur. Eyni zamanda, abituriyentlər müsahibə mərhələsindən də keçir, bu da onların akademik və şəxsi keyfiyyətlərini qiymətləndirməyə imkan verir. Beləliklə, attestat balı ilə qəbul təhsilin keyfiyyətinə zərər vermir; əlavə yoxlama və qiymətləndirmə mexanizmləri mövcuddur.
Attestat balına əsaslanan qəbul sistemi tələbənin uzunmüddətli akademik göstəricilərini əks etdirir.
Bu gün dünya təhsilin əlçatanlığına çalışır. İndi universitetə qəbul olmaqdan daha vacib göstərici onun necə bitiriliməsidir. Tələbənin akademik uğuru, layihələrdə iştirakı, tədqiqat fəaliyyəti və diplom nəticələri onun bilik və bacarıqlarını, eyni zamanda əmək bazarındakı yerini müəyyən edir.
Tural Əhmədovun qeyd olunan fikri qeyri-etik olmaqla yanaşı, həm faktlarla, həm də təhsil təcrübəsi ilə ziddiyyət təşkil edir.
Qərbdə "universitetlər tələbə qəbul etmir, tələbə özünü universitetə qəbul etdirir" anlayışı mövcuddur. Onlar düşünür ki, könüllü fəaliyyətlər, sosial işlər və ünsiyyət gücü tələbənin imtahan nəticələrindən daha çox dəyərlidir".
"DİA-AZ" bildirir ki, F.Şahbazlı sonda öz mövqeyinin hansısa marağa və qərəzə söykənmədiyinə işarə edərək aşağıdakı ifadəni də xüsusi olaraq vurğulayıb:
"Şəxsən mən özüm Türkiyədə magistr pilləsinə attestat balı ilə qəbul olmamışam..."
