"Özümə görə yazmıram, mən aldım, amma bu cür davam etməz, edə bilməz, insanlara etdiyiniz bu zülmlə siz də davam edə bilməzsiniz! Sizə TƏBİB-dən söz açım..." "DİA-AZ" xəbər verir ki, bunu öz etiraz dolu açıqlamasında tanınmış jurnalist Ramilə Qurbanlı yazıb.

O saha sonra özünün sosial şəbəkə hesabında bunları qeyd edib: "Uşağa sağlamlıq haqqında arayış almaq üçün 3 poliklinikaya 20 həkimə baş çəkməli oldum. Birində analiz-filan verdik, göndərdilər ikinciyə ki, sistemə orda vurulmalıdır. Gedib orda həkimlərdən də keçməli idik, getdik, birindən keçdik, ikincidən, üçüncü üçün dedilər üçüncü xəstəxanaya getməlisiniz. Tüstülənmədimmi? İşdən 1 saatlıq icazə almışam, çünki uşaq özü o qədər məsafəni ictimai nəqliyyatla bir günə qət edə bilməz. Biri şəhərin bir başında, digəri o biri, üçüncü daha da uzaq. Bir sağlamlıq arayışı üçün daha nə qədər məsafə qət etməli, neçə kabinetə girib, nə qədər həkimlə cəhləşməliyik? Biri deyir indi əlimdə işim var, günortadan sonra gəl, o biri ümumiyyətlə yerində yoxdur. Sahə poliklinikasına gedib 20 manat verib bir dəqiqənin içində həll etdiyim vaxtlar üçün qəribsədim. Bu nə sistemdir yaratmısınız? Məqsədiniz nədir? Niyə öz poliklinikamızdan ala bilmirik bu arayışı? Niyə məzuniyyətdə olan həkimi əvəz edən yoxdur, biz niyə əziyyət çəkməliyik? Sistem niyə hər bir poliklinikanın özündə deyil? Uşaq qəbul alıb, getməlidir, vaxt dardır, amma günlərlə arayış arxasınca qaçmalıdır? Mən jurnalist olduğum üçün yaxşı adamlar çox sağ olsunlar, köməklik etdilər, həkimləri səfərbər edib süründürməçiliyin qarşısını aldılar, bəs, binəva millət necə eliyir, neçə günə, hansı zülmlərlə alır o arayışı? Yazıq deyilmi insanlar? Xəbəriniz varmı, o sistem əlindən həkimlər özləri intiharlıq olublar? Hamı boğaza yığılıb. Qanun belədir deyə işlətdiyiniz bu nə sistemdirsə özünü doğrultmur, ziyanlıdır, niyə sırıyırsınız bizə? Bir sağlamlıq arayışına görə uşaqlı-böyüklü əsəb sistemimiz sıradan çıxacaqsa..., üzrlü sayın, heç kimə lazıım deyil o sistem. Zəhmət çəkin, dəyişin qaydalarınızı, yaratdığınız sistem insanların sağlamlığına və rahatlığına xidmət etsin, asanı qəlizləşdirib "hər şey sizin məmnuniyyətiniz üçün" deməklə gözdən pərdə asmayın!

P.S. TƏBİB-də işləmişəm, oradakı həmkarların da xətri əzizdir, heç bir qərəzim yoxdur, cəmiyyətin sözünü, həqiqəti deməliyik ki, əyrilər düzəlsin..."