Hələ keçən günlərdə məlumat verərək bildirmişdik ki, işğaldan azad olunmuş Qarabağın və şərqi Zəngəzurun inşaasında, yenidən qurulmasında iştirak edən bəzi xarici iş adamları əslində dövlətimizin xüsusi xidmət orqanları tərəfindən ciddi şəkildə təftiş olunmalıdır. Çünki ayrı-ayrı məmurların çətiri altında Qarabağda inşaata cəlb olunanlardan bəzilərinin əslində ölkəmizdə çirkli pulları yuduğu və yaxud da daha betəri, terrorçulara belə aid olma ehtimalı olan qara pulları dövriyyəyə buraxdığı, və ya elə terrorçular üçün ölkəmizdən pul qazandığı ciddi şəkildə araşdırılmalıdır.
Biz "DİA-AZ" olaraq konkret şəkildə şübhələndiyimiz bir faktı təqdim etmişdik. Söhbət uzun müddət "Azərsu"nun sabiq rəhbərliyinin Azərbaycandakı ortağı olmuş və Türkiyədə PKK terror təşkilatı ilə əlaqələrinin olması ilə bağlı iddialar həm yerli və həm də xarici KİV-lərdə yer almış Erin Mollaoğlu adlı birisindən gedir.
Qeyd edək ki, bu adam Azərbaycanda uzun illərdir ki, "TÜRKİYƏLİ SAHİBKAR" adı altında kamufulyaj olunsa da barəsində, qeyd etdiyimiz kimi, yetərincə ifşaedici faktlar da mətbuatımız tərəfindən ictimailəşdirilib.
Kimdir bu adam? Bir daha xatırladaq...
Erin Mollaoğlu – kimdir və niyə bu qədər önəmli fiqura çevrilib?
Əldə olunan məlumata görə, Erin Mollaoglu Türkiyə vətəndaşı, kürd əsillidir və Türkiyədə PKK-nın siyasi qanadı sayılan HDP-yə səs verib. O, özünü Türkiyə Prezidenti Rəcəb Tayyib Ərdoğanın nümayəndəsi kimi təqdim edir, amma bu tamamilə yalan və saxta imicdir. Həqiqətdə, Erin nə Ərdoğanın, nə də Türkiyə dövlətinin rəsmisidir. O, FETÖ və PKK ilə əlaqəli dairələrlə təmasdadır.
"Azərsu" tenderləri kimə və necə verilir?
İddialara əsasən, Erin Mollaoglu, Azərsun-un keçmiş rəhbərləri – Qorxmaz və Elman vasitəsilə Azərbaycanda illərlə böyük pullar qazanıb. Bu gün isə Azərsu-nun hazırkı rəhbəri Zaur Mikayılov ilə yaxınlıq quraraq, müxtəlif tenderlərə “xod” tapıb. Tenderlərin birbaşa Erin Mollaoglu-nun şirkətlərinə verildiyi bildirilir. Bu, dövlət büdcəsinin ciddi şəkildə istismar edildiyini göstərir.
Kəlbəcərdə baş verənlər daha da ağırdır
Erin Mollaoglu hazırda Kəlbəcər rayonunda restoran, market, aptek və digər obyektlər tikdirib. Bildirilir ki, bu obyektlər İcra başçısı Azər Qocayevlə razılaşdırılmış şəkildə tikilib. Hətta Erin açıq şəkildə deyir:
“Azərin marketini, aptekini, restoranını mən tikmişəm. Məni rahat buraxın.”
İddialara əsasən, bu işlər qarşılığında Azər Qocayev bir dəfə 50 min manat, bir dəfə isə 100 min manat pul alıb.
NƏDƏN BU FAKTLARI XATIRLATDIQ...

Bir neçə gün əvvəl cənab Prezident İlham Əliyev Kəlbəcərdə bir sıra açılışlar etdi və Erin Mollaoğlu tərəfindən inaş olunaraq icra başçısı Ayaz Qocayevə hədiyyə olunmuş marketdə də oldu...
Təbii ki, bu zaman Prezidenti məlumatlandıranlar marketin obyekt kimi sahibinin kimliyindən və necə ərsəyə gəlməsindən danışası deyildilər. Onlar sadəcə, görülən işləri "bahalı upakovka"da təqdim edərək gözə kül üfürməklə məşğuldurlar ki, bu da faktdır.
Biz isə "DİA-AZ" olaraq bu gün gözəl Kəlbəcərimizin mayasına qatılan HARAMDAN - həm də hər an təhlükəyə çevrilə biləcək bir fundamentdən danışırıq. Hər halda, gərəkən qur4umlar mütləq şəkildə hərəkətə keçməlidir... Əks halda, Türkiyədə bitməkdə olan PKK üçün gözəl Kəlbəcərimiz bir barınağa çevrilə bilər...