Gəncə şəhər Mənzil-Kommunal Təsərrüfatı İstehsalat Birliyi və "Gəncə Körpü Tikinti-2" Açıq Səhmdar Cəmiyyətinin müəmmalı işbirliyi

Gəncə şəhər İcra Hakimiyyəti Əli Məmmədov küçəsindəki "Ekoloji Park" kompleksinin və onun ətrafında abadlıq işlərinin satınalınması ilə əlaqədar tender elan edilərək, 6.189.463,25 AZN maliyyə ayırıb. Bundan əvvəl isə analoji tender 2023-cü ildən elan olunmuşdu. Hansı ki, Gəncə şəhər Mənzil-Kommunal Təsərrüfatı İstehsalat Birliyi tərəfindən tenderin qalibi olan "Gəncə Körpü Tikinti-2" Açıq Səhmdar Cəmiyyəti Gəncə şəhərində yolların əsaslı təmiri işlərinin satınalınmasına 24.07.2023-cü ildə 9.915.755,65 AZN maliyyə ayrılmışdı və işlərin 2025-ci ilin sonunda bitəcəyi bildirilir.

Maraq doğuran odur ki, 06.11.2024-cü ildə isə eyni ad altında Gəncə Şəhər Mənzil-Komunal Təsərrüfatı İstehsalat Birliyi "Gəncə Körpü Tikinti-2" Açıq Səhmdar Cəmiyyətinə Gəncə şəhər yollarının əsaslı təmirinə 9.847.742,45 AZN maliyyə ayırıb. 07.11.2024-cü il tarixində isə Gəncə Şəhər İcra Hakimiyyəti "Göygöl Tikinti" Məhdud Məsuliyyətli Cəmiyyəti Gəncə şəhərində yolların əsaslı təmir işləri satınalınmasına 969.338,5 AZN maliyyə ayırıb.

Diqqətçəkən tenderlərin tarixidir. Hansı ki, "Göygöl Tikinti" Məhdud Məsuliyyəti Cəmiyyəti (07.11.2024) ilə digər qalib olmuş şirkət "Gəncə Körpü Tikinti-2" Açıq Səhmdar Cəmiyyəti (06.11.2024) bir gün fərqlə tenderi qazanıblar. Odur ki, Gəncə şəhər yollarının təmirinə ayrılan tenderlər şübhə doğurur.

12.06.2025-ci il tarixində isə Gəncə Şəhər İcra Hakimiyyəti tərəfindən "Gəncə Körpü Tikinti-2" Açıq Səhmdar Cəmiyyətinə Gəncə şəhərində yolların əsaslı təmir işlərinə 2.897.827,35 AZN maliyyə ayrılıb. Bu qədər təsadüf ola bilməz ki, "Gəncə Körpü Tikinti-2" Açıq Səhmdar Cəmiyyəti bütün tenderlərin qalibi olsun, yolların təmirinə və abadlıq işlərinə milyonluq maliyyə xərcləsin.

Tenderlərin məbləğinə baxanda aydın olur ki, dəyəri milyon manatdan artıq olan tenderlər "Gəncə Körpü Tikinti-2" Açıq Səhmdar Cəmiyyətinə məxsusdur.

Eyni ad altında, Gəncə şəhər yollarının əsaslı təmirinə bu qədər məbləğdə, yəni 6.189.463,25 AZN, abadlıq işlərini çıxmaqla, yerdə qalan 24 milyona yaxın vəsaitin Gəncə şəhərində hansı böyük prospektin, küçənin asfaltlanmasına ayrılması sual altındadır.

Gəncə şəhərində mərkəzi prospektlərə yaxın olan küçələr var ki, hələ də asfalt işləri görülməyib. Bunlar əsaslı təmirə ehtiyac olan küçələrdir.

Tenderlərdə şübhə doğuran tarixlərə də diqqət etsək görərik ki, qısa müddət ərzində Gəncə şəhər yollarının əsaslı təmirə ehtiyac olması mümkünsüzdür. Axı, gərək çəkilən yollar yararsız olsun ki, yenidən tender elan edib, maliyyə ayrılaraq əsaslı təmir aparılsın.

Həm də yalnız "Gəncə Körpü Tikinti-2" MMC ilə işbirliyi görmək də müəmmalıdır. Burda müəyyən şübhələr var. Azərbaycanda kifayət qədər peşəkar fəaliyyət göstərən inşaat şirkətləri mövcuddur. Necə ola bilər ki, Gəncə Şəhər İcra Hakimiyyətinin tenderlərini yalnız "Gəncə Körpü Tikinti-2” MMC qazanır? Bu sualın cavabı açıq qalır.

Hurriyyet.az