Son günlər SOCAR-ın əksər strukturlarında olduğu kimi, "Siyəzənnfet" Neft Qaz Çıxartma İdarəsinin rəhbərliyi də işçilərə qarşı açıq diskriminasiya siyasəti yürütməsi, onları imtahan etmək adı altında təhdid etməsi və hədə-qorxu gələrək onların hüquqlarını tapdaması ilə diqqətə gəlməkdədir.
"DİA-AZ" xəbər verir ki, bununla bağlı SOCAR işçisi Zamiq Əliyev hədələnən həmkarlarına müraciət edərək onları hüquqi baxımdan haqlı mövqedə olduqlarını, özlərini sona qədər müdafiə etməli olduqlarını da xatırladıb.
Z.Əliyev müraciətində deyir: " "Siyəzənneft"in işçilərinin nəzərinə çatdırım ki, sizi attestasiya ilə hədələyirlərsə, həmin attestasiya haqqında qanunda aşağıdakı bənd mövcuddur:
2.4. Attestasiya komissiyasının üzvləri tərəfindən işçiyə yalnız tutduğu vəzifəyə (peşəyə) əmək funksiyasına, ixtisasına (peşəsinə) dair, yerinə yetirdiyi işlər və onların nəticələri barədə, habelə tutduğu vəzifəyə (peşəyə) uyğunluğunu müəyyən etmək üçün zəruri olan əmək müqaviləsi ilə müəyyən edilmiş hüquqları, vəzifələri dairəsinə aid olan məsələlərlə əlaqədar suallar verilir. Attestasiya olunan işçinin siyasi baxışlarına, mənəvi, əxlaqi kamilliyinə, şəxsiyyətinə, etiqadına və digər sırf şəxsi dəyərlərinə görə, o cümlədən onun intizamlılıq dərəcəsinə görə peşəkarlıq səviyyəsinin qiymətləndirilməsi yolverilməzdir.
Yəni sizə ancaq tutduğunuz vəzifəyə görə sual verilə bilər. Bunun əksi edilsə məhkəməyə müraciət edə bilərsiniz. Hərənizin ən azı 30 il iş təcrübəniz var. Kimsədən qorxmayın, işinizi bilirsiniz... imtahan edirlərsə, etsinlər... ərizə yazmayın, pul sizi aldatmasın!
Xatırladım ki, həmin qanunda attestasiya olunmayan işçilər də var:
Maddə 66. Attestasiya olunmayan işçilər
Aşağıdakı işçilərin attestasiyası keçirilmir:
vətənin müdafiəsi, azadlığı və ərazi bütövlüyü uğrunda hərbi əməliyyatlarda xəsarət (yaralanma, travma, kontuziya) almış və əlilliyi müəyyən edilmiş işçilər;
Azərbaycanın müstəqilliyinin və ərazi bütövlüyünün müdafiəsi zamanı göstərdiyi şücaətlərə görə dövlət təltiflərinə və fəxri adlarına layiq görülmüş işçilər;
bir vəzifədə (peşədə) beş ildən az müddətdə çalışan məcburi köçkün və qaçqın statusu olan işçilər;
hamilə qadınlar;
uşağının üç yaşınadək sosial məzuniyyətdə olan və həmin məzuniyyət bitdikdən sonra bir ildən az müddətdə müvafiq vəzifədə (peşədə) çalışan qadınlar (uşağını təkbaşına böyüdən kişilər);
yaşı 18-dən az olan işçilər;
bir vəzifədə (peşədə) faktik olaraq bir ildən az müddətdə çalışan işçilər;
eyni vəzifədə (peşədə) azı üç dəfə attestasiya olunaraq tutduğu vəzifəyə uyğun olduğu müəyyən edilmiş işçilər;
kollektiv müqavilələrdə (sazişlərdə) nəzərdə tutulan hallarda attestasiya olunmayan işçilər..."
