Azərbaycan Prezidenti cənab İlham Əliyevin həyata keçirdiyi xarici və daxili siyasət bu gün dünya miqyasında nümunə kimi göstərilir. Güclü dövlət quruculuğu, beynəlxalq müstəvidə qazandığımız mövqelər və ölkə daxilində aparılan genişmiqyaslı islahatlar xalqın rifahına xidmət edir. Lakin təəssüflə qeyd etmək lazımdır ki, bəzi məmurlar öz vəzifə səlahiyyətlərindən sui-istifadə etməklə bu uğurlu siyasətə kölgə salır, şəxsi maraqlarını dövlətin və vətəndaşın maraqlarından üstün tuturlar.

Yasamal rayonunda isə bu paradoks açıq-aşkar görünür. Rayon icra başçısı Elşad Həsənov təyin olunduğu gündən etibarən bir sıra əhəmiyyətli quruculuq və abadlıq işlərinə imza atıb. Sakinlər dəfələrlə vurğulayıblar ki, məhəllə arası yolların bərpası, yeni istirahət parklarının salınması və infrastruktur layihələri rayona yeni nəfəs gətirib. Elşad müəllimin fəaliyyəti real nəticələrlə ölçülür və bu, ictimai rəydə də öz təsdiqini tapır.
Amma nədənsə bəzi məmurlar var ki, öz məsuliyyətsizlikləri ilə bu işlərə kölgə salmağa çalışırlar. Bəlkə də “çalışırlar” sözünü işlətmək artıqdır, çünki onların gördüyü işlər sadəcə biganəliyin, səhlənkarlığın və “mənə nə” yanaşmasının məhsuludur.

“Jek”in təmizliyi – komediya, yoxsa faciə?

"DogruXeber.az"ın redaksiyasına bir neçə gün öncə Yeni Yasamal, Dairəvi küçə 1-ci döngə sakinlərindən müraciət daxil olmuşdu. Sakinlər haqlı olaraq illərdir təmir olunmayan küçənin bərbad vəziyyətindən, zibilliyə dönmüş ərazidən və antisanitar şəraitdən şikayətlənmişdilər.
Deyəsən, bu xəbərdən sonra Mənzil-Kommunal Təsərrüfat Birliyinin müdiri Vüsal Hüseynov və 19 №-li Mənzil İstismar Sahəsinin müdiri Kamal İsmayılov “hərəkətə keçməli” olublar. Amma nəticə? Tam bir satira nümunəsi!

Əraziyə göndərilən işçilərin əksəriyyəti yaşlı insanlardır. Sakinlərin dediyinə görə, onlar yabanı otları təmizləməkdə, iri daşları yığışdırmaqda əməlli-başlı əziyyət çəkiblər. Nəticədə isə ortada “yarımçıq komediya” qalıb – zibillərin böyük hissəsi olduğu kimi yerində, otlar isə hələ də yol kənarında qonaqlıq edir. Fotolarda da açıq görünür ki, görülən işlər sadəcə “gözə kül üfürmək” məqsədilə edilib.
Belə çıxır ki, Yasamalda təmizlik işləri artıq sanitar xidmət yox, teatr tamaşasına çevrilib. Tamaşanın rejissoru isə bəlli məmurlardır – Hüseynov və İsmayılov.


Sual yaranır: bu məmurlar kimə və nəyə arxayın olub belə laqeydlik göstərirlər?

Axı, Elşad Həsənovun apardığı quruculuq işlərini bu cür səhlənkar addımlarla nüfuzdan salmaq, əslində, rayon rəhbərliyinə qarşı “təcavüzdür”.

Vətəndaşların gözündə hörmət qazanmış başçının işinə kölgə salmaqla, onlar kimə xidmət edirlər?
Əgər məmur vəzifəsinə görə məsuliyyət daşımırsa, deməli, ya arxasında kimlərinsə dayağı var, ya da sadəcə, dövlət siyasətinə qarşı biganə mövqe tutur. Hər iki halda bu, bağışlanmazdır.

Növbəti hədəf – bələdiyyə

Qeyd edək ki, həmin ərazinin asfaltlanması ilə bağlı Yasamal Bələdiyyəsinin sədri Tahir Məmmədovun sakinlərə illərdir verdiyi “yalan vədlər” hələ də reallaşmayıb. Hətta sədrin bəzi qaranlıq işləri barədə də ciddi iddialar dolaşır.

Bütün bunlar isə bir daha göstərir ki, mərkəzi hakimiyyətin uğurlu siyasəti və rayon rəhbərliyinin səyləri bəzi məmurların şəxsi maraqları, səhlənkarlığı və “başdangetdi iş” üslubu ilə kölgəyə salınır.

Biz, "DogruXeber.az" olaraq bildiririk: belə səhlənkar məmurlar dövlətin nüfuzuna kölgə salmaqla, həm də xalqın etimadını zədələyirlər. Ümid edirik ki, bu faktlar nəzərdən qaçmayacaq və barəsində danışılan şəxslər barədə ciddi tədbirlər görüləcək.