Kanal14.az xəbər verir ki, Lənkəranda baş verən bir olay ölkədə təhsilin hansı durumda olduğunu bir daha açıq şəkildə ortaya qoydu. Lənkəran rayonu Zövlə kənd tam orta məktəbində tərbiyə işləri üzrə direktor müavini Qurbanın məktəb şagirdinə və hətta qadın xadiməyə qarşı zor tətbiq etməsi faktı nəinki kameraların yaddaşına düşüb, həm də ictimaiyyətin gözü önündə dövlət orqanlarının acizliyini üzə çıxarıb.

Bu hadisə filmdən çıxma səhnəni xatırladır: bir tərəfdə şagirdi və xadiməni döyən məmur, digər tərəfdə isə qanunları tətbiq etməli olan qurumların susqunluğu. Polis faktı araşdırır, prokurorluq nəzarət edir, amma nəticədə cinayət işi rədd edilir. Məktəbin həmkarlar təşkilatında məsələ müzakirə olunur, amma təsadüfən (!) həmin təşkilatın sədri təqsirkar müavinin qardaşı olur və nəticədə sadəcə töhmətlə kifayətlənilir. Direktor onu işdən çıxarır, Əmək Müfəttişliyi isə direktoru cərimələməklə məsələni “həll edilmiş” sayır. Daha da betəri, məhkəmə Qurbanı işinə bərpa edir və indi bu şəxs yenidən “şagirdlərə tərbiyə verməkdədir”.



Əslində, bütün bu proses bir zəncirdir: təhsildə korrupsiya, idarəçilikdə özbaşınalıq və dövlət qurumlarının qanunsuzluğa göz yumması. Bu hadisə göstərdi ki, Azərbaycan təhsil müəssisələrində qanun yox, şəxsi maraqlar və “bazar qaydaları” işləyir. Şagirdi döymək, xadiməni təhqir və zərbə altında qoymaq adi hadisəyə çevrilib və dövlətin bütün strukturları buna haqq qazandırır.

Burada məsuliyyət ilk növbədə Təhsil Nazirliyinin üzərinə düşür. Təhsil naziri Emin Əmrullayev illərdir təhsilin keyfiyyətini artırmaq əvəzinə, yalnız kosmetik layihələrlə məşğuldur. Məktəblərdə nəzarət, intizam və şəffaflıq yoxdur. Əksinə, müəllim və şagirdlər “təhsil adı altında” zorakılığın və ədalətsizliyin şahidi olur. Nazirliyin yarıtmaz idarəçilik mexanizmi məktəbləri bazar prinsipləri ilə işləyən müəssisələrə çevirib – kiminsə qardaşı, kiminsə pulu, kiminsə vəzifəsi varsa, o, istədiyini edə bilər.

Cəmiyyətin sualı haqlıdır: bu ölkədə haqq-ədalət varmı? Yoxsa sadəcə pulunu ver, mövqeyini tap və etdiyin qanunsuzluğa bəraət qazan? Lənkərandakı bu hadisə, əslində, bütöv təhsil sisteminin çökməsinin simvoludur. Şagirdin və məktəb əməkdaşının hüquqlarını müdafiə etməyən dövlət, hansı gələcəkdən danışa bilər?

Kanal14.az olaraq bildiririk ki, bu məsələ diqqətimizdədir və biz soruşuruq: şagirdin döyüldüyü məktəbdə, xadimənin təhqir olunduğu bir məkanda Təhsil Nazirliyi hansı üzlə “təhsil islahatlarından” danışır? Hadisənin məlumatlarını Rabil Abdinov adlı şəxs öz Facebook sosial şəbəkə hesabında paylaşıb.