Qobu bələdiyyəsinin adı son illərdə ictimaiyyətdə çox zaman qalmaqallarla hallanır. İndi isə gündəmə gələn yeni səs yazısı bu qalmaqalların yalnız təsadüfi söz-söhbət olmadığını, əksinə, sistemli bir korrupsiya və qanunsuzluqlar zəncirinin mövcudluğunu göstərir. Bələdiyyə sədri Araz Nəcəfovun yaxın qohumlarının yayılan etiraf xarakterli söhbətləri, sədri uzun müddətdir müdafiə edən dairələrin belə artıq tərəddüd içində qalmasına səbəb olub.

Bir vaxtlar haqqında cinayət işləri açılmaq təhlükəsi yarananda müxtəlif “yollarla” məsələni ört-basdır edən, bəzi şəxslərin vasitəsilə canını qurtaran Araz bəyin bu dəfə vəziyyətdən çıxması çətin görünür. Çünki yayılan səs yazısı onun əməllərinə dair konkret fakt və sübut xarakteri daşıyır.

Ən ciddi ittiham isə torpaq məsələləri ilə bağlıdır. Yerli sakinlərin haqqı olan torpaq sahələrinin saxta sənədlərlə satılması, nəticədə milyonlarla vəsaitin şəxsi cibə yönəldilməsi artıq sirr deyil. Bu prosesdə sadəcə bələdiyyə rəhbəri deyil, yaxın ətrafının da fəal iştirak etdiyi indi açıq-aşkar görünür.

İronik odur ki, bələdiyyə sədri öz sələfi Ənvər Əmraslanovun “ənənələrini” davam etdirməkdə ittiham olunur. Görünür, Qobu bələdiyyəsində kreslo dəyişsə də, qaydalar dəyişməyib – yalnız imza sahibi fərqli olub.

Daha maraqlısı isə odur ki, sədri yalnız torpaq məsələlərində deyil, digər sahələrdə də qanunsuzluqlara görə cərimələyiblər. Məsələn, yaxın keçmişdə Ekologiya və Təbii Sərvətlər Nazirliyi tərəfindən ona 3500 manatlıq inzibati cərimə tətbiq olunub. Yəni, qanunun tələblərinə əməl etməmək artıq onun idarəçilik “üslubunun” bir parçasına çevrilib.

Bu gün isə vəziyyət tamam fərqlidir. İctimai rəyin təzyiqi, media vasitəsilə yayılan səs yazıları və insanların illərlə yığılan narazılığı fonunda, Araz Nəcəfovun “gizli dayaqları” da bir-bir sıradan çıxır. Çünki heç kim artıq açıq-aşkar ifşa olunmuş bir şəxsin ipindən yapışaraq quyunun dibinə enmək istəmir.

Qobu sakinlərinin uzun illərdir səsləndirdiyi narazılıqlar indi sübuta yetir. Əgər əvvəllər bu narazılıqlar “subyektiv fikirlər” kimi təqdim olunurdusa, indi yayılan materiallar sədri susmağa məcbur edib. O, artıq nə ictimaiyyət qarşısına çıxıb cavab verə bilir, nə də əvvəlki kimi müdafiəçilərinin arxasında gizlənə bilir.

Bütün bunların fonunda sual ortaya çıxır: uzun illərdir özbaşınalıqla idarə olunan bir bələdiyyə strukturu niyə bu qədər toxunulmaz görünürdü? Cavab isə çox sadədir – sistemli şəkildə formalaşmış korrupsiya mexanizmi. Amma indi bu mexanizmin dişliləri arasında ilişib qalan Araz Nəcəfovun aqibəti heç də ürəkaçan görünmür.

Bu hadisə yalnız bir şəxsin deyil, bütövlükdə bələdiyyə sisteminin problemlərinin göstəricisidir. Çünki sədrlər dəyişir, adlar dəyişir, amma korrupsiya və torpaq alveri qalır. Bu isə artıq cəmiyyətin sadəcə bir şəxsdən deyil, bütün idarəçilik mexanizmindən narazılığını ortaya qoyur.

Yaxın günlərdə prosesin hansı istiqamətdə inkişaf edəcəyi məlum olacaq. Amma bir şey dəqiqdir: Qobu sakinlərinin haqqının yeyilməsi, torpaqlarının satılması və illərlə davam edən özbaşınalıqlar bu dəfə cəzasız qalmayacaq kimi görünür.

Kanal14.az