Bakıda mənzillərdə qaz sayğaclarının istismar müddətinin başa vurmasını, sayğacların az pul yazmasını bəhanə edərək “Azəriqaz”ın əməkdaşları mənzil sahibləri evdə olmadan, heç bir xəbərdarlıq etmədən sayğacları söküb, yeni sayğaclar ilə əvəz edirlər. Halbuki, mənzil sahibi evdə olmadan köhnə sayğacın yenisi ilə əvəzlənməsi qanunsuzdur. Həmçinin sayğacın düzgün işləyib-işləməsi araşdırılmadan, sayğac müvafiq laborotoriyadan keçmədən, az yazdığını iddia edərək, vətəndaşın iştirakı olmadan yenisi ilə əvəzlənməsi də qanunsuzdur. Əslində, sayğacı dəyişmək lazımdırsa, “Azəriqaz”ın əməkdaşları mənzil sahibi evdə deyilsə, rəsmi bildiriş göndərməlidirlər. Buna baxmyaraq, ən yaxşı halda qurumun əməkdaşları sayğacı dəyişib, sayğacın dəyişdirilməsi ilə bağlı aktı qonşuya təqdim edirlər ki, aktı mənzil sahibinə versin. Amma bütün hallarda, bu, yolverilməzdir. Axı, mənzil sahibi niyə sayğacının dəyişdirilməsi barədə məlumatı və yaxud aktı qonşudan almalıdır? Bu halın doğru olmamasına rəğmən, “Azəriqaz” əməkdaşları bu cür qanunsuzluğa yol verirlər. Bu cür qanunsuzluqla üzləşənlərdən biri də məhz “Hürriyyət”in əməkdaşıdır.
Əməkdaşımızın bildirdiyinə görə, ona məxsus mənzildə qaz sayğacının az pul yazması bəhanəsi ilə evdə adam olmayanda sayğacı söküb, yenisi ilə əvəz ediblər: “Azəriqaz”ın əməkdaşları şübhələnirsə ki, sayğac az yazır, bütün hallarda vətəndaş evdə olanda sökməlidirlər. Əslində, yeni sayğac qoyulmadan köhnə sayğac ekspertiziya getməlidir, oradan rəy alınmalıdır ki, bu sayğac həqiqətən də az yazır. Az yazırsa, dəyişdirilməlidir. Normalda bizdə sayğac aylıq 2-3 manat pul yazır. Evdə istilik sistemi olduğundan qışda da mavi yanacaqdan çox istifadə olunmur. Belə desək, ancaq yemək bişirmək, çay qaynatmaq üçün istifadə olunur.
Digər tərəfdən, hətta sayğacda hər hansı problem olsa belə, xəbərdarlıq etmədən dəyişdirilməsi qanunsuzluqdur. Üstəlik, yeni qoyulan sayğacın düz işləyib-işləməməsi də sual altındadır. Bəlkə də çox yazır, vətəndaş hardan bilməlidir.
Üçüncüsü də, heç bir əsas olmadan 36 manat borc yazıblar. Halbuki, köhnə sayğacda 5 manat pul var idi. Əslində, mütəxəssislər ən azı ildə 1-2 dəfə sayğaca nəzarət etməlidir ki, sayğac az, yoxsa çox yazırsa, müəyyən olunsun. Belə deyək, sayğac az yazırsa, bunun vətəndaşa nə dəxli var? Sayğacı vətəndaş quraşdırmır ki. Əgər, plombu yerindədirsə, heç bir kənar müdaxilə yoxdursa, bu məsələdə vətəndaş məsuliyyət daşımamlıdır”.
Əməkdaşmız onu da nəzərə çatdırdı ki, sayğacı dəyişib, prtokol tərtib edilib və onu da qonşuya veriblər: “Yeni sayğacın balansında 10 qəpik olur. 1 manat da kredit almaq imkanı var. Biz bu məbləği 25 gün istifadə etdik. Qaz kəsiləndən sonra yeni müqavilə bağlamaq üçün “Asan Kommunal”a getdim. Bu zaman mənə məlum oldu ki, 72 manat borc yazılıb. Mən orada əsaslandıra bilmədim ki, mən 25 günə 1manat 10 qəpik istifadə etmişəmsə, mənim 72 manat borcum necə yaranıb və neçə ilin borcudur. Tutaq ki,bir aya 5 manat istifadə etmişəm. Axı, sayğac neçə il nəzarətsiz işləyib ki, mən 72 manat borclu qalmışam?! Orada da şahidi oldum ki, bu cür hallar çoxdur və əksər hallarda vətəndaşları məcbur edilər ki, əsassız yazılan borcu ödəsin. Maraqlıdır ki, mənim borcum olmadığı halda, 36 manat pulu haradan yazıblar? Üstəlik də 36 manatı ikiyə vururlar. Hansı məntiqlə bunu edirlər, anlamıram. Bu haqda heç bir açıqlama verilmir”.
Əməkdaşımız məsələ ilə bağlı 28 mayda yerləşən 2 saylı “Asan Kommunal”da şahidi olduqlarını da açıqladı: “Burada mənə aydın oldu ki, onlarla insan evdə olmadan, heç bir məlumat verilmədən sayğaclarını söküblər. Yəni bu, bir növ kütləvi xarakter alıb. Necə ola bilər, sayğacın hamısı az yazır?! Niyə çox yazmır, az yazır? İstismar müdəti bitibsə, vətəndaş evdə olan zaman gəl, sayğacı dəyiş. Və yaxud dəyişirsənsə, bu, borc nədir? Əslində, sayağca görə ödənilən borclar dövlət hesabına ödənilir və borcları sadəcə vətəndaşın belinə yükləyirlər. “Azəriqaz” burada milyonlarla manatlıq korrupsiyaya yol verir”.
“Mənzilə dəfələrlə gedirlərsə, mənzildə heç kim yoxdursa və yaxud qapını açımırlarsa, qüsurlu sayğac yeni sayğacla əvəzlənir”
Məsələ ilə bağlı “Azəriqaz” İstehsalat Birliyinin mətbuat xidmətinin rəhbəri İbrahim Kərbalayev “Hürriyyət”ə bildirdi ki, sayğacda hər hansı bir qüsur baş verdikdə abonent tərəfindən “Azəriqaz” İstehsalat Birliyinə məlumat verilməliydi: “104, 185 cağrı mərkələzri günün 24 saatı fəaliyyət göstərir. Əgər bu məlumatları “Azəriqaz” İstehsalat Birliyinin əməkdaşları aşkarlayırsa, mənzilə dəfələrlə gedirlərsə, mənzildə heç kim yoxdursa və yaxud qapını açımırlarsa, əməkdaşlar tərəfindən o qüsurlu sayğac yeni sayğacla əvəzlənir. Üzərindən çıxan qaz sayğacı laboratoriyaya yoxlanmaq üçün göndərilir. Çox güman ki, özləri evdə olmadığı üçün quraşdırılma aktı qonşuya verilib. Təbii ki, aktı qonşuya veriblərsə, bunu gizlin etməyiblər. Mənzildə adam olmayıb, dəfələrlə mənilzdə adam olmadığına görə aktı da qonşuya veriblər ki, abonent qazsız qalmasın. Həmin o quraşdırma aktını və köhnə kartı abonent “Asan Xidmət” vasitəsilə “Azəriqaz” İstehsalat Birliynin nümayəndələrinə verir və o yeni kart alır”.
“Sayğacda qüsur baş verə bilər”
İ. Kərbalayev onu da dedi ki, 36 manat borcun yaranmasının səbəbləri müxtəlif ola bilər: “Deyirsiniz kartdan sitifadə edib, borc haradan yarana bilər? Sayğacda qüsur baş verə bilər, sayğac mənfiyə işləyər. Nəzərinizə çatdırmaq üçün deyirəm, misal üçün 20 manat pul ödəyər, amma qazdan 40 manatlıq istifadə edər, klapan bağlanmaz. Yəni orada borc, sərf olunan təbii qazın dəyəri yaranar. Onu araşdırmaq lazımdır. Onu müraciət edib, öyrənə bilərlər. “Azəriqaz” İstehsalat Birliyinin “Asan Xidmət”də olan nümayəndələri onlara hər bir detalı izah edər. Yəni abonent istəsə, “Asan Xidmət”də abonent baza məlumatı var. Sayğac quraşdırılan müddətdən indyə qədər həmin vətəndaş nə qədər təbii qazdan istifadə edib, nə qədər ödəniş edib, onların hamısı orada öz əksini tapıb”.
36 manatın ikiyə vurulma məsələsinə gəlincə, “Azəriqaz” İB-nin rəsmisi dedi ki, 1700 kubmetr qazın dəyəri 10 qəpiklə hesablanr: “1700 kubdan artıq sərf edilən qazın dəyəri Tarif Şurasının qərarına əsasən 20 qəpiklə hesablanır. Yəqin ki, ikiyə vurulma söhbəti onunla bağlıdır”.
“Bu, oğurluq kimi bir şeydir”
“Azərqaz”ın keçmiş əməkdaşı Baba Rzayev isə bildirdi ki, mənzil sahibi evdə olmadan sayğacın sökülməsi və əvəzlənməsi doğru deyil: “Bu, oğruluq kimi bir şeydir. Əgər akt bağlayıblarsa, onu imza elətdirməliydilər. O aktın özü rəis tərəfindən təsdiq olunmalıdır, möhür vurulmalıdır. Sonra həmin aktın əsasında o borcu hesablamaqdan ötrü əmr yazılmalıdır. Borcu hesablamaq qaydası var. Bir ay ərzində nə qədər istifadə olunursa, ondan artıq borc yaza bilməzlər. Hələ laboratoriyanın aktı olmalıdır ki, o sayğac düz işləyir, yoxsa işləmir. Ondan sonra onu tətbiq edə bilərlər. Bu, qanunsuzluqdur. Bu iş məhkəmə vasitəsilə yoluna qoyulmalıdır. O sayğac planlı surətdə çıxarılmayıb, o şərlə çıxarılıb. Bir var kütləvi planlı şəkildə sayğacları dəyişirlər. Sən haradan bilirsən ki, o sayğac az yazır? Onlar evinə gedib baxmayıb ki, bu adam aylıq nə qədər qaz istifadə edə bilər. Evə baxıb onun əsasında yoxlamalıydılar ki, bu sayğac düz işləmir. Ona görə də o akt əsassız və qanunsuz aktdır”.
“Bu, abonentin ayağına pul yazmaq üçündür”
B. Rzayev onu da vurğuladı ki, mənzil sahibinin akta qol çəkməsindən başqa, hətta iki nəfər hal şahidi olmalıyıdı: “Laboratoriya rəyi olmadan sayğacı necə dəyişə bilərlər? Bunun hamısı fırıldaqdır. Bu, abonentin ayağına pul yazmaq üçündür. Onların özlərini cərimələmək lazımdır ki, bu cür haqsız hərkətlər edirlər. Laboratoriya rəyi olmasa, o cəriməni də yaza bilməzlər. Evdə adam olmadan istismar olunan sayğacı sökmək, bu sayğacı oğurlamaqdır. “Azəriqaz”ın borclarını ödəmək üçün belə işlər görürlər.
Tək bu, deyil. Məndə 4 məhkəmə işi var. Türkan qəsəbəsində yaşayan bir nəfərə 23 min 400 borc yazmışdılar. Guya ki, həmin adam “levi” xətlər işlədib. Məhkəmə yolu il mən 18 min 600 manatını ləğv etdirdim”.
Hurriyyet.org
