“Azəravtoyol” ASC sədri Saleh Məmmədov gündəmin əsas personajlarından biridir. Onun göstərişi ilə nakam şair Mikayıl Müşviqin abidəsinin dağıdılması ayrı-ayrı faktları da ortaya çıxarıb.
“Günah keçisi” iş icraçısı və...
“Gündəm-Xəbər”in media üzərindən araşdırması zamanı bir sıra nüanslar meydana çıxıb ki, hər birində S.Məmmədovun adı hallanır. Həmin faktları qeyd etməzdən əvvəl deməliyik ki, ASC sədri Dəmir Yolları QSC sədri Cavid Qurbanovun kadrıdır. Ona görə də ən yüksək səviyyədə hiddə doğuran abidənin götürülməsi olayı C.Qurbanovun da başını ağradıb. Ölkə rəhbərliyi tərəfindən cəza əmri verilən günahkar şəxslər hələ ki, iş icraçısı səviyyəsində cəzalandırılıb “Azəravtoyol” bəyan etdi ki, “8 N-li Xüsusi Təyinatlı Yol İstismarı” MMC-nin iş icraşısı "Azəravtoyol" ASC-nin rəhbərliyinə və çalışdığı MMC-nin direktoruna məlumat vermədən görkəmli şair Mikayıl Müşfiqin ərazidə yerləşən büstünü götürüb. Buna görə də öz üzərinə düşən əmək funksiyasını lazımi qaydada yerinə yetirməyərək kobud şəkildə qanun pozuntusuna yol verdiyinə görə, “8 N-li Xüsusi Təyinatlı Yol İstismarı” MMC-nin iş icraçısı Rəhimov Ramiz Tapdıq oğlu tutduğu vəzifədən azad edilərək işdən çıxarılıb. Həmin MMC-nin direktoru Şirinov Əliheybət Balakişi oğluna xəbərdarlıq edilib, MMC-nin baş mühəndisi Hüseynov Yuris Xələf oğluna isə töhmət verilib. Lakin “Azəravtoyol” ASC-nin ləğvi və S.Məmmədovun vəzifəsiz qalacağı ehtimalı da böyükdür. Yəni, ən yüksək səviyyədə cəza yaxın aylarda gözlənilir.
Sədrin “kassir”i kimdir?
“Gündəm-Xəbər”in media üzərindən araşdırması zamanı Saleh Məmmədovun əsas pul kisəsi 1-ci müavini Əvəz Qocayevdir. İddialara görə, Ə.Qocayevin Bakının 8-ci mikrorayon, Cəfər Xəndan küçəsində 20-yə yaxın obyekti olduğu bildirilir. Birinci müavin sədrin “kassir”i kimi tanınır və idarədə möhkəm mövqeyi var. Azəravtoyol ASC sədr müavini Əvəz Qocayevin adı müxtəlif vaxtlarda bir sıra xoşagəlməz məqamlarda hallanıb, fəaliyyətinə dair tənqidi xarakterli məqalələr yayımlanıb. Onun sabiq nəqliyyat nazirinin yaxın adamı kimi xarakterizə edirlər. Əvəz Qocayev Ziya Məmmədovun sayəsində bu posta gətirilib. İndi S.Məmmədovun “sağ əli” kimi tanınır. Əvəz Qocayev bir müddət əvvəl Mingəçevir Şəhər İcra Hakimiyyətinin başçısı postu uğrunda gedən mübarizəyə qatılmışdı. Deyilənlərə görə, həmin vaxt Nəqliyyat Nazirliyinin yetkili şəxslərindən biri Əvəz Qocayevin Mingəçevir Şəhər İcra Hakimiyyətinin başçısı vəzifəsinə gətərilməsindən ötrü bir xeyli çaba sərf etsə də, sonda uğursuzluğa düçar olub. Mətbuatda gedən iddialara görə, sabiq nazir müavini Arif Əsgərovun da adının hallandığı, 50-yə yaxın sahibkar zərər çəkdiyi 48 milyon manatlıq mənimsəmədə Əvəz Qocayevin də adı keçir.
Kürəkən necə azadlığa çıxıb?
Belə ki, bu maliyyə maxinasiyası ilə bağlı Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həbs olunan adıçəkilən QSC-nin marketinq şöbəsinin rəisi Rahib Hüseynovun Əvəz Qocayevin kürəkəni olduğu bildirilir. Həmçinin o da qeyd olunur ki, Rahib Hüseynovun azadlığa çıxmasında əsas səbəbkar qayınatası Əvəz Qocayevdir. Deyilənlərə görə, o, kürəkəninin azadlığa çıxa bilməsi üçün bəzi nüfuzlu şəxslərə minnətçi düşüb. O dövrdə Əvəz Qocayev “Azəryolservis”in “ən strateji” departamentinin rəhbəri olmaqla yanaşı Cavid Qurbanovun seçki qərargahına da rəhbərlik edib. Onu da deyək ki, 8 saylı Yol Yaşıllaşdırma İdarəsində qanun pozuntuları adi hal alıb. Rəis Vasif Məmmədovun işindəki əyrinti halları idarənin səlahiyyətlərinə aid olan işlərin lazımi səviyyədə icra edilməsinə imkan yaratmır. Vasif Məmmədovu “Azəravtoyol” ASC-də birbaşa himayə edən şəxs, qurumun sədr müavini- Avtomobil yollarının istismarı idarəsinin rəisi Əvəz Qocayevdir. Qeyd edək ki, bu məmurların hər ikisi əslən Tovuz rayonundandır. Buna görə də aralarında kifayət qədər yaxın münasibətlər mövcuddur. Eyni zamanda da, iddialara görə, Əvəz Qocayev idarə müdirini himayə etməklə, onun müxtəlif maxinasiyalardan əldə etdiyi külli miqdarda gəlirlərə də şərik olur.
Heykəlin verdiyi ibrət
Ümumiyyətlə, “Azəravtoyol” ASC hamıdan xəbərsiz şəkildə Mikayıl Müşfiqin heykəlini götürdü. Sonra da buna nə formadasa haqq qazandırmağa çalışdı.
Amma ən yuxarı səviyyədə ciddi reaksiyalara səbəb oldu. Yəni cəzalananlar yenə olacaq. Amma bu həm də digərlərinə bir dərs olmalıdır. Bakı Şəhər İcra Hakimiyyəti də belədir. Ağlına nə gəldi edir, yolu qazır, yol polisinə xəbər vermir, kanalizasiya xəttini kəsir, su borusunu dağıdır, Azərsu-ya xəbər vermir, qısacası, heç kimi saymır, bildiyini edir. Bu baxımdan, başqa qurumlar yolda bir iş görəndə özlərindən yuxarıdakılarla məsləhət etməlidirlər. Əslində, elə qanunlar da bunu tələb edir. Amma məmurlar nə qanunları sayır, nə də bir iş görəndə qonşu qurumları məlumatlandırır. Bakını xaosa çevirən “Azərsu” ASC, “Azəravtoyol” ASC, BŞİH olur. Haranı gəldi qazırlar, tökürlər, sürücülərə zülm edirlər, şəhərin altını üstünə çevirirlər. Bakının küçələri yenə qazıq-qazıq olunur. Şəhərin müxtəlif istiqamətlərində qazıntı işlərinin aparıldığını görmək olar. Bu vəziyyət də tıxacların yaranmasına gətirib çıxarır. Prezident xətaya yol verən məmuru cəzasız qoymur və ictimaiyyətin də bu cəzadan xəbəri olur. Prezident son dərəcə həssaslıq nümayiş etdirir və insanların heysiyyatına toxunan əməlləri görə məmurlarla bağlı ölçü götürür. İstər xalqa “otxod” demiş deputat ola, istər nakam şairin abidəsinə vandal münasibət. Hansı sahəyə rəhbər təyin edilmiş insanlar o sahəni inkişaf etdirə bilmirsə, o sahənin öhdəsindən gələ bilmirsə, əlbəttə ki, orada kadr islahatlar davam edəcək.
Silinən pullar və işbirliyi
Yeri gəlmişkən, Torpaq və Xəritəçəkmə Komitəsi kimi adıçəkilən bu qurumların da ləğvi gündəmdədir. “Azəravtoyol” ASC-nin də ayrılıqda fəaliyyəti mənasızdır. Azərbaycanda Açıq Səhmdar Cəmiyyətlərinin fəaliyyəti heç də ürəkaçan deyil. Bu qurumları daha çox pulsilən dəzgahlara bənzətmək olar. Onlara rəhbərlik edən şəxslərin əksəriyyəti tenderlərdə pul udur, maxinasiyalara yol verir, büdcə pullarını çırpışdırır. Bu ASC-lərə ötən 10-12 il ərzində həm dövlət büdcəsindən, həm xarici kreditlər hesabına milyardlarla dollar investisiya yönəldilsə əsasən pis menecment ucbatından onların maliyyə səmərəliliyi çox aşağıdır. Bu ASClərin dövlət büdcəsi qarşısında milyardlarla manat vergi borcları yığılıb qalıb. Xatırladaq ki, prezident sərəncamı ilə “Azəravtoyol”a ayrı-ayrı rayonlarda çəkiləcək yolların tikintisi üçün ayrılan vəsaitə Saleh Məmmədov özünə yaxın MMC-ləri də ortaq edir. “Azəravtoyol”un tabeliyində demək olar ki, hər rayonda yol-istismar idarələri olsa da, bu idarələr bir kənarda saxlanılır, əvəzində isə böyük maliyyə imkanlarına sahib olan şəxslərin nəzarətindəki MMC-lər respublikadaxili strateji yolların tikintisinə cəlb olunurlar. Amma həmin MMC-lərin çoxunun nə yol tikintisində təcürbəsi var, nə də müvafiq texnikaları. Texnikaların çoxu icarəyə götürülərək, layihədə istifadə olunur ki, bu da əlavə vəsait sərfiyyatı deməkdir. Bu isə büdcə pullarının yayındırılmasına imkan yaratmaqla yanaşı işin keyfiyyətinə də mənfi təsir edir. Məlumatlı şəxs deyib ki, Saleh Məmmədov İmişlidə “OREN MMC” adlı bir şirkətin sahibi olan Astan Şükürovu ASC-nin regional idarəsinin rəhbəri vəzifəsinə təyin edib. Bu MMC ilə pullar silinib. Qeyd edək ki, Məmmədov Saleh Ərşad oğlu 1958-ci ildə Azərbaycan Respublikasının Tərtər rayonunda anadan olub. Azərbaycan İnşaat Mühəndisləri İnstitutunun “Sənaye və mülki tikinti” fakültəsini bitirib.
