Yeni Yasamal, 2-ci Yaşayış Massivi, 3 saylı binanın sakinləri müşkülə düşmüş problemlərini həll etmək üçün döymədikləri qapı qalmayıb. Lakin indiyədək də qarşılaşdıqları problemləri aradan qaldırmaq üçün müraciət etdikləri dövlət idarələrindən cavab ala bilmirlər.
Gununsesi.info-ya müraciət edən bina sakinləri hazırda nə edəcəklərini bilmirlər. Binanın problemlərini həll etmək üçün dövlət idarələrinin qapılarını döyən komendant Sakit Həmidov baş verən qanunsuzluqlarla bağlı çəkiliş qrupumuzu sözügedən ünvana dəbvət etdi.
Gununsesi.info-nun reportyor qrupu hadisə yerində olub sakinlərlə görüşdü.
-Sakit müəllim, sakinlərin problem nədir?
-Yeni Yasamal, 2-ci Yaşayış Massivi, bina 3, mənzil 19-un sahibiyəm. Sözügedən binanın tikintisi 2005-ci ildə başlayıb. 2008-ci ildə isə başa çatıb və sakinlərə təhvil verilib. Bundan sonra binanın istismara verilməsiylə bağlı bütün sənədlər hazırlanıb, kommunikasiya xidmətlərinə dair işlər görülüb. Hazırda bu binada 84 ailə yaşayır. Lakin bu günədək etdiyimiz bütün müraciətlərə baxmayaraq, bina sakinlərinin yaşadıqları və sahib olduqları məzillərə “kupça” almaq məsələsini həll edə bilmirlər. Bütün toplanmış sənədlər daşınmaz əmlakın qeydiyyatı üzrə ərazi idarəsinə təqdim olunmasına baxmayaraq, indiyədək problem öz həllini tapmayıb.
-Səbəb nə gösrərilir?
-Səbəb onu göstərirlər ki, bu binanı tikən şirkətin adı MMC gedir. Binanın adı dəyişdirilib MTK olmalıdır, daha sonra vətəndaşlarla yenidən müqavilə bağlanmalı, notarial qaydada qeydiyyatdan keçməlidir, yalnız bundan sona Bakı şəhər Ərazi İdarəsində bu işə baxıla və sakinlərə qeydiyyat şəhadətnaməsindən çıxarış verilə bilər.
-Sadaladığınız prosesi həyata keçirmək mümkün deyilmi?
-Xeyr. Onları həyata keçirmək mümkün deyil. Çünki sözügedən MMC-nin iki təsisçisi var. Onlardan biri hazırda həbsdədir. Başqa bir məsləylə bağlı ona qarşı cinayət işi qaldırılıb, 14 il cəza verilib. O da həbsdən azadlığa çıxmayanadək bizim problemimiz həll oluna bilməz. Əgər kooperativ məsələsi gündəlikdə durarsa, bunu həll etmək mümkün olmayacaq. Amma burada başqa suallar da meydana çıxır. Sakinlər başa düşə bilmir ki, axı nə fərqi var, binanını tikən MMC-dir, ya Mənzil Tikinti Koooperativi? Hər ikisi binanı tikib vətəndaşa satır. Eyni əməliyyat və prosesdir. Burada nəyə görə, ayrı-seçkilik qoyulmasının səbəbini başa düşə bilmirik.
-Problemin həll edilməsiylə bağlı harasa müraciət etmisinizmi?
-Bəli, etmişik. Əmak Məsələləri üzrə Dövlət Komitəsinin sədrinə, müavininə, daha sonra apellyasiya şikayətinə baxan bir qurum vardı, ona belə müraciət etmişik. Lakin bütün qurumlardan eyni cavabı alımışıq. Yazırlar ki, MMC MTK-ya çevrilsin, ondan sonra məsələ həll olunar.
-Həmin MMC-ni MTK etməyə sakinlərə nə mane olur?
-Xeyr. Bu işi həyata keçirmək sakinlərin gücü və səlahiyyəti xaricindədir. Çünki qeyd elədiyim kimi, təsisçilərdən biri hazırda həbsdədir. Sənədləri hazırlayıb həbsxanada ona təqdim etdim ki, imzalasın. Lakin sonradan nə fikirlşdisə, zəng vurdu ki, mən sənədləri imzalaya bilmərəm.
-Bəs demədi, niyə imza ata bilməz?
Dedi ki, mənim bu binayla bağlı haqq-hesablarım var. Onları çıxıb bitirim, sonra baxaram.
-Bəs digər təsisiçinin fikri nə oldu?
-Digər təsisçinin cavabı müsbətdir. Onun etirazı yoxdur.
-Bu prosesi həyata keçirmək üçün təsisçiliyin azadlıqda olan şəxsə verilməsi mümkündürmü?
-Məhkəmə qaydasında, hüquq müstəvisində bunu etməyin mümkün olub- olmamasını bilmirik.
-Hüquq müdafiəçilərinə və ya hüquqşünasıara bununla bağlı müraciət etmisinizmi?
Etmişik. Əgər təsisçilərdən biri bununla bağlı məhkəməyə verilərsə, ikinci tərəf apellyasiya şikayəti verəcək. Ali Məhkəməyə müraciət edəcək. Beləliklə, bu çəkişmə illərlə uzanıb, davam edəcək.
-Bəs çıxış yolunu nədə görürsünüz?
Daşınmaz əmlakin qeydiyyatı barədə olan sənəddə dəyişiklik edilməlidir. Yəni, səlahiyyətlər eyniləşdirilərsə, o zaman belə problemlər ortaya çıxmayacaq. Çünki məntqlə yanaşanda bunun heç bir mənası yoxdur. Qanunda ayrı-seçkiliyə yol veriblər. Bununla bağlı dəyişiklik edilməsi üçün məsələ Milli Məclisdə müzakirəyə çıxarılmalıdır. Bunun başqa çıxış yolu yoxdur. Bəlkə var, amma biz bilmirik.
–Bu məsləylə bağlı məhkəməyə müraciət etmisinizmi?
Bakı Şəhər İcra Hakimiyyətini (BŞİH) məhkəməyə vermişdik. BŞİH bizdən qanunsuz olaraq, binanın istismar aktını təsdiq etmək üçün mənzillər istəyirdi. Biz tələb edilən mənzilləri verə bilməzdik. Çünki təsisçilər, burada işləyən işçilər binadakı bütün mənzillərin hamısını satıb, çıxıb gediblər. Burada boş mənzil yox idi. Onlara nə mənzil verilməliydi ki?!
– Həmin mənzilləri nəylə bağlı istəyirdilər, rüşvət kimi?
-Deyirdilər ki, guya belə bir qanun var. Tikilən binanın yaşayış fondunun 10 faizi BŞİH-ə verilməliydi. Buna görə də iddia ərizəsiylə məhkəməyə müraciət etdik. Məhkəməyə müraciət olunduqdan sonra BŞİH sənədlərimizi imzaladı və dedi ki, gedin məhkəmədən əziənizi geri götürün. Biz də onların istəyini yerinə yetirdik. Bundan sonra isə həmin sənədi Əmlak Məsələləri üzrə Dövlət Komitəsinin Bakı şəhəri Ərazi İdarəsinə təqdim etmişik. Bu dəqiqədə də ərizəmiz oradadır. Lakin indiyədək də ərizəmizə heç bir cavab verilməyib ki, istismar aktı qəbul olunur, ya yox. Yaxud, bunun sonrakı prosedur qaydaları necə olmalıdır? Dəfələrlə müraciət etməyimizə baxmayaraq, heç bir məlumat yoxdur.
-Bəs maraqlanmırsınız ki, niyə cavab yoxdur?
-Maraqlandıq. Əvvəlcə gizlədirdilər. Ümumiyyətlə, ərizəmizin idarədə olmasını inkar edirdilər. Lakin ərizəni təqdim edərkən qeydiyyata aldırıb, bir nüsxəsini də özümdə saxlayırdım. Ərizənin qəbul edilməsiylə bağlı imzalı sənədi təqdim etdikdən sonra dedilər ki, bəli, belə bir ərizə qəbul edilib. Amma varsa, bəs cavab da olmalıdır, axı. Cavab isə yoxdur. Nəyə görə, axı, vətəndaş əziyyət çəkməlidir? Onların qeydiyyat, təhsil, əsgərlik, sığorta, tibbi yardım və digər sahələr üzrə lazım olan sənədə ehtiyacları var. Hazırda bu şəxslərin qeydiyyatı yoxdur. Faktiki olaraq, burada yaşayırlar. 2008-ci ildən sakinlər burada yaşayırlar. BŞİH-in təsdiqlədiyi istismar aktinda da göstərilir ki, hazırda sakinlər məskunlaşmış vəziyyətdə bina istismara qəbul edilib. Yaxşı, əgər bina istismara qəbul edilirsə, nəyə görə bu sənədi bizə vermirlər. Nəyə görə, çıxarışı ala bilmirik? Konkret bir söz deyən də yoxdur. Hər dəfə bir söz deyirlər. Sənədlər var məndə…
–Hazırda Bakıda sizin vəziyyətinizdə olan neçə belə bina var?
– Bir neçə belə bina var. Hansı ki, sakinlər problem və stress içində yaşayırlar. Sakinləri get-gələ salan məmurlara üzümüzü tutub deyirik ki, zəhmət olmasa, bircə dəfə qanunları vərəqləsinlər. Bu vətəndaşların cəmi bir cümləyə ehtiyacları var. Bircə cümləylə bütün problemlərimiz həll olunar. Sakinlər gedib vergisini, rüsumlarını ödəyər. Görün, bu 9 ildə dövlət büdcəsinə nə qədər ziyan dəyib. Axı nəyə görə, vətəndaş hər xırda məsələ üçün prezidentə müraciət etməlidir? Lakin hazırda cənab İlham Əliyevdən başqa kömək istətəcəyimiz ayrı şəxs də yoxdur. Biz sakinlər üzümüzü prezident İlham Əliyevə tutub, xahiş edirik: Cənab prezident, 84 mənzilin 250 sakininin sizin koməyinizə ehtiyacı var. Lütfən bizə kömək edin…
