DİA.AZ: - Qeyd edək ki, bir müddət əvvəl kənar güclərin təsiri altında olan bəzi qüvvələr Azərbaycana qarşı sanki səfərbər olunmuş kimi göründülər. Təbii ki, burada söhbət xüsusən Rusiya ərazisinə sığınan və Azərbaycana düşmən ölkələrin xüsusi xidmət orqanları tərəfindən himayə olunan etnik separatçılardan gedir. Keçən ay həmin antiAzərbaycan qüvvələrin simalarından biri kimi tanınan Fəxrəddin Abbasovun (Aboszadə) həbsi isə separatçıları yenidən hərəkətə gətirdi.
Bildirək ki, ölkəmizə qarşı talış separatizmi zəminində kəşfiyyat-pozuculuq fəaliyyəti ilə məşğul olan, 1956-cı ildə Lerik rayonunda anadan olmuş, hazırda RF-də yaşayan, AR vətəndaşı, 2005-ci il dən etibarən mütəmadi olaraq Ermənistana səfərlər edərək, dövlət orqanları və qeyri-hökumət təşkilatlarının nümayəndələri ilə görüşlər keçirən, Ermənistanın xüsusi xidmət orqanları ilə geniş əlaqələri olan Abbasov Fəxrəddin Fərman oğlu barəsində Azərbaycan Respublikası hüquq-mühafizə orqanları tərəfindən cari ilin iyul ayında AR cinayət məcəlləsinin 281.1 və 283-cü maddələri ilə cinayət işi açılmış və barəsində axtarış elan edilib. Müvafiq sorğu əsasında F.Abbasov 06 sentyabr 2018-ci il tarixdə Moskva şəhərində hüquq mühafizə orqanları tərəfindən saxlanılaraq Liberçk Məhkəməsinin qərarı ilə barəsində 1 aylıq həbs qəti imkan tədbiri seçilib. Son məlumatlara görə, 02.10.2018-ci il tarixdə Qərar qüvvədə saxlanılaraq həbs qəti imkan tədbirinin daha 5 ay müddətinə uzadılıb.
Bununla bağlı DİA.AZ-a daxil olan məlumatların təhlilindən müəyyən edilir ki, F.Abbasovun saxlanılması talış separatçıları tərəfindən birmənalı qarşılanmayıb. Belə ki, separatçıların bəzi hissəsi sözdə F.Abbasovun həbsinə etirazlarını bildirsələr də, əməldə onun həbsini adi hal kimi qarşılayanlar da coxluq təşkil edir. Qeyd olunmalıdır ki, bəzi talış separatçıları tərəfindən F.Abbasov uğursuz siyasətçi, qorxaq, öz mənafeyini hər şeydən üstün tutan, riyakar, ikiüzlü şəxs kimi səciyyələndirilir.
Təəccüblü deyil ki, Ermənistanda bir qrup alim və siyasi şəxslər Fəxrəddin Abbasova erməni xalqı uğrunda xidmətlərinə görə, sonuncuya vətəndaşlığın verilməsi üçün baş nazir Nikol Paşinyana müraciət ediblər. Müraciət edən şəxslər arasında “Modus Vivendi” analitik mərkəzinin rəhbəri Ara Papyan, keçmiş deputat Araqts Axoyan, politoloq Qrayr Ulubabyan, eləcə də Ermənistanda fəaliyyət göstərən bir sıra analitik mərkələrin sədrləri və digər tanınmış şəxslər vardır. Nikol Paşinyana ünvanlanan müraciət, Fəxrəddin Abbasovun Azərbaycanın dövlətçiliyi əleyhinə fəaliyyətinin, internet resursları vasitəsilə təxribat xarakterli çıxışlarının məhz düşmən ölkə Ermənistanın diqtəsi altında həyata keçirilməsinin bariz nümunəsidir.
Həmçinin, F.Abbasovun həbsindən sonra radikal talış separatçıları Şabanov İsmayıl Musarza oğlu və Nəsirov Adil Böyükağa oğlunun liderlik uğrunda mübarizə aparmaları müşahidə olunur və sonuncular tərəfindən F.Abbasovun azad olunmasına ciddi səylər göstərilmir.
DİA.AZ-a daxil olan məlumatlardan o da aydın olur ki, radikal talış separatçısı əvvəllər Ermənistan Respublikasından sığınacaq alan, lakin sonradan elə F.Abbasovun ER-dəki əlaqələri vasitəsilə maliyyə vəsaitinin bölüşdürülməsi səbəbindən aralarında yaranmış mübahisəyə görə oradan biabırçı vəziyyətdə qovulmuş (iddia olunur ki, qadın paltarında qovulub –red.) Məhərrəmov Zabil Cəmil oğlu isə F.Abbasovun həbsi ilə əlaqədar mövzu barədə müzakirələrdə iştirak etmir və ümumiyyətlə bu barədə fikir bildirməkdən yayınır.
İ.Şabanovun Rusiyada nüfuzsuz bir şəxs olması faktı F.Abbasovun 02.10.2018-ci il tarixdə baş tutmuş məhkəmə prosesində öz təsdiqini tapıb. Belə ki, İ.Şabanov məhkəməyə özündən əlavə cəmi 3 nəfər gətirə bilib ki, bu da diqqətlərdən yayınmayıb.
Hazırda İ.Şabanov və A.Nəsirov üzdə F.Abbasovun həbs edilməsinə guya maneələr törətməyə çalışdıqlarını bəyan edirlər, əslində isə hər ikisi sonuncunun həbs edilməsinin tərəfdarıdır. Buna səbəb isə F.Abbasovun azadlığa çıxacağı təqdirdə liderə çevrilmək şansının onlardan çox olmasıdır.
Yekun nəticə isə ondan ibarətdir ki, yuxarıda adları qeyd olunan şəxslər talış kartından istifadə edərək xarici XXO-lardan külli miqdarda pullar alır və yalnız öz şəxsi mənafelərini güdür, onlara əlavə imtiyazlar yaradacaq “liderlik” uğrunda mübarizə aparırlar.
Məlumatların təhlilindən belə aydın olur ki, RF-də yaşayan və özlərini talış millətinin təəssübkeşi kimi göstərməyə çalışan bəzi şəxslərin bu istiqamətdə cərəyan edən proseslərdən öz maliyə imkanlarının artırılmasına və mövqelərinin möhkəmləndirilməsinə xidmət edir. Elə bunu Rusiya paytaxtında fəaliyyətdə olan Azərbaycan diasporasının üzvləri də təsdiqləyirlər. Belə ki, redaksiyamızı bilgilərindən soydaşlarımızdan birinin sözlərinə görə, artıq Fəxrəddin Abbasovu “işlənmiş kart” kimi dəyərləndirən Adil Nəsirovla İsmayıl Şabanov konkret olaraq iqtisadi imtiyazlar uğrunda bir-biriləri ilə çəkişməkdədirlər. Onlar bu günə qədər Fəxrəddin Abbasovu himayə edən Ermənistanın xüsusi xidmət orqanlarının marağını cəlb edə bilmələri üçün bəlkə bundan sonra daha da sərt formada xəyanət yarışına girəcəklər. Bunu da mənbəmiz söyləyir.
Bildirək ki, bütün bunlar Azərbaycanda millətlərarası münasibətlərə hansısa formada xələl gətirə bilməz və belə bir səviyyədə deyil. Yəni kimlərinsə sırf maddi maraqlar səbəbilə hansısa xəyanətkar addımlara əl atması Azərbaycanda xalqların ümumi birliyi və rifahı üçün heç bir təhlükə hesb oluna bilməz və bu birliyi pozmaq iqtidarlnda deyil. Azərbaycanda bütün etnik xalqlar vahid dövlətimizin inkişafı uğrunda, ümumi evimiz olan Azərbaycanın çiçəklənməsi naminə fəaliyyət sürdürür ki, bu həqiqəti də elə hazırda Azərbaycana qarşı iki-üç separatçını sırf tamah məqsədilə yönləndirməyə müvəffəq olan düşmən ölkələrin xüsusi xidmət orqanları da yaxşı başa düşürlər.
Mövzu diqqətimizdədir. Əlavə bilgilərimiz olacaq. Bizi izləməkdə davam edin...
