Adı müxtəlif korrupsiya, maxinasiya, eks-prezidentə sui-qəsddən tutmuş İran kəşfiyyatı ilə əlaqələrədək hallanan baş dəmiryolçu referendumdan sonra üçün çırmanıb
Oliqarx-nazirlər arasında qeyri-rəsmi rəqabət, didişmə və iqtidar kluarlarında ciddi şəkildə pərdəarxası mübarizə gedir “Azərbaycan Dəmir Yolları” QSC-nin yeni sədri Cavid Qurbanov vitse-prezidentliyə hazırlaşır. Bu barədə “Gündəm-xəbər” qəzetinə mötəbər mənbədən daxil olan məlumata görə, baş nazirlik iddiasında olan baş dəmiryolçu indi yeni postun eşqinə düşüb. Baş nazir postunun ləğvinin gündəmdə olması və referendumdan sonra siyasi islahatların keçiriləcəyi C.Qurbanovu fikrindən daşındırıb. Baş dəmiryolçu daha yüksək vəzifəyə - prezidentə daha yaxın posta ambisiyalıdır. Qaynağımızın sözlərinə görə, QSC sədri vitse-prezidentlik institutuna namizədlər sırasında yer alıb. Onunla birgə bu mübarizəyə bir neçə yüksək ranqlı məmur da qoşulub. Amma C.Qurbanovun nə dərəcədə şansı olması bilinmir. “Azəryolservis” ASC rəhbəri olduğu dövrdə kifayət qədər neqativ reputasiyaya sahiblənmiş Qurbanovun “Azərbaycan Dəmir Yolları” QSC-də hər hansı xüsusi fəaliyyəti nəzərə çarpmır. Mənbə qeyd edir ki, ilk günlərdə alovlu açıqlamalar verən QSC sədri xələfini də baqaja qoymağa cəsarət etmişdi və Arif Əsgərovun bu sektoru məhv etdiyini dolayısı ilə açıqlamışdı. Əlavə də etmişdi ki, ciddi islahatlar, işlər görüləcək. Amma hələ ki heç bir yenilik yoxdur. İndisə vitse-prezidentliyə iddialıdır və ölkə rəhbərliyinin bu məsələyə münasibəti tam aydın deyil. Oliqarxnazirlər arasında qeyri-rəsmi rəqabət, didişmə və iqtidar kluarlarında ciddi şəkildə pərdəarxası mübarizə gedir. Mənbənin “Gündəm-xəbər”ə qeydlərinə görə, vitse-prezidentliyə iddialı nazirlərin ambisiyası artıq bir-birinin qulağına da çatıb. Qaynağımız qeyd edir ki, bu vəzifəyə tamah salan nazirlərin bir-birindən duyuq düşməsi onların artıq rəqibləri əleyhinə kampaniya hazırlığına start verib. Yaxın günlərdə oxucular nazirlərə yaxın mediada, bəzi xəbər portallarında və qəzet səhifələrində vitse-prezidentlik savaşina şahidlik edəcəyi söylənir. Bu mühüm posta kimin sahiblənəcəyi bəlli olmasa da, prosesin indidən başladığını söyləmək olar. Nazirlərin bir-birinə yönəlik qara piar kampaniyası mətbuatın gündəmində bomba kimi partlayacaq. Hətta bu savaşın açıq xarakter alacağı da istisna olunmur. Məlumatda deyilir ki, bu mübarizədə bir neçə nazir və komitə sədrinin adı keçir. Hələlik mötəbər mənbədən daxil olan məlumatlarda iddia edilir ki, vergilər naziri Fazil Məmmədov, nəqliyyat naziri Ziya Məmmədov, AZAL prezidenti Cahangir Əsgərov vitse-prezidentlik sevdasına düşüb. Siyahı adıçəkilən məmurlarla məhdudlaşmır; gələn xəbərlərdə qırmızı xətt kimi adı keçənlər də var, onlardan biri Azərbaycan Dəmiryol QSC rəhbəri Cavid Qurbanov, səhiyyə naziri Oqtay Şirəliyev və təhsil naziri Mikayıl Cabbarov da var. Lakin ikinci siyahıda baş dəmiryolçu istisna olmaqla digərlərinin şansı çox aşağı qiymətləndirilir. Habelə, ilkin siyahıda yer alan baş pilotun da vitse-prezidentlik eşqinə düşməsinə baxmayaraq, imkanları az görünür. Mənbənin sözlərinə görə, baş nazirin müavinləri - Əli Əhmədov, “Qaçqınkom” sədri Əli Həsənov da yeni institutun ilk vitse-prezidenti kimi tarixə düşməyə iddialıdır. Ehtimal olunur ki, Ə.Həsənovun da şansı az deyil. Lakin yekun söz prezidentindir. Hər halda ahıl yaşda olan hazırkı baş nazir Artur Rasizadədən sonra yeni baş nazir olmayacağı da çox uzaqda deyil. Mənbə bildirib ki, ölkə başçısı İlham Əliyevin konstitusiyaya dəyişikliklərlə bağlı qərarı əslində, hakimiyyətdəki bəzi qruplaşmalar üçün olduqca gözlənilməz olub. Amma onlar tələm-tələsik özlərini toparlayaraq yeni mərhələyə qədəm qoymağı bacarıb. Məlum olur ki, birinci vitse-prezident və vitse-prezidentlər müvafiq situasiyalarda prezidentin səlahiyyətlərini icra etmək statusuna malikdirlər. Bu da hakimiyyət daxilində ikincilik uğrunda mübarizəni yenidən alovlanmasına səbəb olub. Xatırladaq ki, bu layihəyə qədər hakimiyyət daxilində baş nazirlik uğrunda savaş gedirdi. Lakin konstitusiyaya dəyişikliklər ediləcəyi təqdirdə baş nazir postunun demək olar ki, əhəmiyyəti qalmayacaq. Ona görə də indidən vitse-prezidentlik uğrunda mübarizəyə start verilib. C.Qurbanovun vitse-prezidentlik sevdası baş nazirlik qədər istəkli görünsə də, rəqiblərin də gücünü azaltmaq olmaz. Üstəlik, baş dəmiryolçu da kifayət qədər korrupsiya ittihamları ilə üzləşib. Dəmiryol QSC sədrinin adı eks-prezidentə sui-qəsddən tutmuş İran kəşfiyyatı ilə əlaqələrədək hallandırılır. Bu günlərdə Dəmiryol QSC-nin sədri, millət vəkili Cavid Qurbanovun müşaviri kimi təqdim olunan Həbib Misirov haqda mediada ilginc məlumatlar yayılmışdı. Cavid Qurbanovun "Azərbaycan Dəmir Yolları" QSC-yə rəhbər təyin olunmasından narazı olması artıq heç kimə sirr deyil. Elə mətbuatda da bu barədə müxtəlif yazılar, aparılan təhlillər göstərir ki, o, məhz nazir olmaq istəyirmiş. Elə axır vaxtlar etdiyi çıxışlar, mətbuat səhifələrində daha tez-tez görünmək də məhz bu istəkdən irəli gəlir. Adi bir fakt. Bir müddət öncə Prezident İlham Əliyev Nazirlər Kabinetinin 2015-ci ilin doqquz ayının sosialiqtisadi inkişafının yekunlarına və qarşıda duran vəzifələrə həsr olunmuş iclas keçirdi. Həmin iclasdan sonra Cavid Qurbanovdan savayı mətbuata açıqlama verən nazir, məmur olmayıb. Bu günlərdə Türkiyənin hakim Ədalət və Qalxınma partiyası (AKP) növbədənkənar qurultay keçirdi. Türkiyənin və bütün dünyanın diqqət mərkəzində olan həmin qurultayda AKP-nin Genəl Başqanı dəyişdi. Türkiyə prezidenti Rəcəb Tayyib Ərdoğanın açıq dəstəyi ilə hakim partiyanın sədri postuna Rabitə və Nəqliyyat naziri Binalı Yıldırımın gətirilməsi Baş nazir kürsüsünün yeni sahibini də müəyyənləşdirmiş oldu. Bu qurultay bizim media tərəfindən də böyük maraqla izlənildi, Binalı Yıldırımla bağlı xəbərlər sosial şəbəkələrin Azərbaycan seqmentində çoxsayda paylaşıldı. Lakin sözügedən qurultayı Azərbaycan cəmiyyəti üçün daha da maraqlı edən bir amil də oldu - “Azərbaycan Dəmir Yolları” Qapalı Səhmdar Cəmiyyətinin sədri, Azərbaycan Milli Məclisinin deputatı Cavid Qurbanovun qardaş ölkənin hakim partiyasının ali tədbirində iştirak etməsi. Azərbaycan və Türkiyənin “bir millət, iki dövlət” olması, iki qardaş cümhuriyyətin prezidentləri arasında siyasi münasibətləri aşan dostluq əlaqələrinin mövcudluğu heç kimə sirr deyil. Ümumiyyətlə, Azərbaycanın istər hakim partiyası, istərsə də müxalifət təşkilatlarının funksionerləri ilə Türkiyənin siyasi elitasındakı müxtəlif fərdlər arasında səmimi münasibətlər mövcuddur. Odur ki, “Azərbaycan Dəmir Yolları” Qapalı Səhmdar Cəmiyyətinin sədri, Milli Məclisin deputatı kimi mühüm görəvlərə sahib olan Cavid Qurbanovun da həmin tədbirdə iştirakı qeyri-adi hal sayılmamalı idi. Lakin məsələ ondadır ki, AKP öz növbədən kənar qurultayına xarici ölkələrdən heç bir qonaq dəvət etməmişdi, o cümlədən ötən konqreslərindən fərqlui olaraq bu dəfə Azərbaycanın hakim Yeni Azərbaycan Partiyasının təmsilçiləri də Binalı Yıldırımın yeni post tutmasına şahidlik etmirdi. Elə bu səbəbdən də Cavid Qurbanovun AKP-nin qurultayında iştirakı və yeni sədr, yeni Baş nazir Binali Yıldırımla səmimi görüş şəkillərinin yayılması xüsusi diqqət çəkdi və suallar doğurdu. Çox keçmədən QSC sədri və deputat bu suallara aydınlıq gətirdi. Cavid Qurbanov bildirdi ki, onun Binalı Yıldırımla şəxsi və ailəvi dostluq münasibətləri var. Amma versiyalar onun baş nazir olacağına aparırdı. İndisə vitse-prezidentlik məsələsi aktuallaşıb. Qeyd edək ki, Cavid Qurbanovun Bakının bir sıra ərazilərində özünə təmtəraqlı villalar inşa etməsi, mənzillər alması hamıya məlumdur. C.Qurbanovun təmtərağına görə seçilən imarəti paytaxtın “Vişnyovka” deyilən ərazidə yerləşir. Bu villa üslubuna, təmtərahına görə nəinki C.Qurbanovun özü üçün inşa etdirdiyi tikililərdən, demək olar ki, Azərbaycan məmurlarının inşa etdirdiyi bütün saraylardan seçilir. Ərazidə yaşayanlar əvvəlcə elə bilirdilər ki, burada səhiyyə ocağı tikilir. Əslində bu məlumatlar C.Qurbanovun əlaltıları tərəfindən yayılmışdı. Buna səbəb isə bu villanın sahibinin kimliyini gizlin saxlamaq idi. Lakin çox keçmədi ki, hər şey bəlli oldu. Cavid Qurbanovun tikililəri təkcə bu villa ilə məhdudlaşmır. Belə ki, mənbənin dediyinə görə, onun Badamdar qəsəbəsində də qəsri var.Bu qəsəbə özünün bir sıra xüsusiyyətləri ilə seçilir. Burada Varlılar məhəlləsi yaranıb. 3-4 mərtəbəli villalardan birini də “Azəravtoyol” Departamentinin rəhbəri Cavid Qurbanov inşa etdirib. Villa C.Qurbanovun tabe olduğu nazirliyin şefinə və bir sıra məmurlara məxsus xan saraylarına yaxın ərazidə inşa edilib. Yaşayış məqsədilə tikilən villalarla yanaşı, C.Qurbanovun özü üçün inşa etdirdiyi başqa istehsal müəssisələri, təsərrüfatlar da mövcuddur. Gəlir gətirən obyektlərdən biri “Fidan” restorandır. Bu restoran həm də şadlıq sarayı kimi fəaliyyət göstərir. Əvvəllər bura şadlıq sarayı idi. İndi həyətində kiçik evciklər tikilir.
Deməli, obyekt restoran kimi fəaliyyətini genişləndirmək istəyir
