“Biz də ciddi şəkildə korrupsiya ilə mübarizəyə qoşulmuşuq. Desək ki, bizdə korrupsiya olmur yalan olar. Çünki, komitənin hər bir yerdə işçiləri var, onların hamısına nəzarət etmək olmur”. Bunu hələ 2010-cu ildə keçirdiyi mətbuat konfransında Standartlaşma, Patent və Meterologiya Komitəsinin sədri Ramiz Həsənov deyib. Komitə sədrinin açıqlamasından təxminən 6 il ötür və bu sahədə korrupsiya tüğyan etməkdədir. Komitə öz səlahiyyətlərini biznesə çevirib və nəzarət adı ilə müxtəlif müəssisələrə, obyektlərə gəlir mənbəyi kimi baxır. “Gündəm-xəbər”in bu barədə apardığı araşdırmalar, əldə etdiyimiz faktlar və şikayətlər, o cümlədən media üzərindən yayılan məlumatlardan çıxan qənaət budur ki, R.Həsənov korrupsiyanı standartlaşdırıb, patentləşdirib və metereologiyaya çevirib. Adi fakt: bu ilin fevralında Azərbaycan Standartlaşdırma, Metrologiya və Patent üzrə Dövlət Komitəsinin Texniki Tənzimləmə və Standartlaşdırma İdarəsində aparılan yoxlamalar zamanı 300 sərəncamın qanunsuz ləğv edilməsi halı aşkarlanıb. Bunu Azərbaycan Hesablama Palatasının auditoru deyib. Pozuntular adıçəkilən qurumun aparat xərclərinin yoxlanılması zamanı aşkar edilib: “Təsəvvür edin ki, sərəncam təqdim edib hansısa qurumda yoxlama aparıblar, daha sonra gəlib həmin sərəncamları ləğv ediblər. Auditor təşkilatlarından xahiş edirəm ki, yoxlamalar apararkən bu məsələləri də nəzərə alsınlar”. Azərbaycan reallığında yoxlama apardıqdan sonra, onun aparılması barədə sərəncamlar o zaman ləğv edilir ki, qurumun rəhbərilə “razılıq” əldə edilir. Daha doğrusu qurumun rəhbəri tələb olunanı verməyə razılaşır. Bu baxımdan Azərbaycan Standartlaşdırma, Metrologiya və Patent üzrə Dövlət Komitəsinin yalnız bir idarəsində yoxlama aparılmasına dair 300 sərəncam ləğv edilməsi bu qurumun sahibkarlarla hansı şərtlərlə işlədiyini əyani nümayiş etdirir. Media üzərindən yayılan xəbərlərə görə, restoranlar, iri ticarət obyektləri, istehsalat müəssisələri, müxtəlif iaşə məntəqələri komitənin hədəfində olan yerlərdir. Bu müəssisələrdə aşkarlanan nöqsanlar rüşvət müqabilində ört-basdır edilir. Xüsusilə məmurlara məxsus obyektlərdə olan qanunsuzluqları görməzdən gəlirlər. Təsadüfi deyil ki, komitənin rəhbəri ölkədə böyük biznes imperiyasına sahiblənib. İllik gəlirlər onu ölkə səviyyəsində oliqarx edib. Dövlətin verdiyi gücdən istifadə edərək müəssisə rəhbərlərinin başına açmadıqları oyun qalmır. Komitənin müxtəlif müəssisələrdə həyata keçirdiyi yoxlamalar formal xarakter daşıyır. Nəticədə R.Həsənov varlanır. Məsələn, meyvə-tərəvəz emal edən kiçik sexlərdən standartlaşdırma, metrologiya və patent üzrə ayrı- ayrılıqda lisenziya almaq tələb edilir. Hər lisenziyanın da qiyməti 1500 manatdır. Halbuki hər bir lisenziya üzrə dövlət rüsumu 120 manatdan çox deyil. Mətbuat yazıb ki, cəmi 3 ay - meyvə-tərəvəz mövsümündə intensiv işləyən müəssisələr üçün bu çox böyük məbləğdir və əksər müəssisə sahibləri bu yükün altına girmək istəmir. Ramiz Həsənov bu vəzifəyə təyin olunduqdan sonra, yəni 2005-ci ildən başlayaraq qurumun ciddi təzyiqi ilə üzləşiblər. Standartlaşdırma, Metrologiya və Patent üzrə Dövlət Komitəsi şadlıq evi və restoranlarda çatışmazlıqlar “aşkarlayır” və hər obyektə dövriyyəsinə görə “haqq” qoyulur. Fantastik standartlar istənilən vaxt şadlıq evlərinə müdaxilə üçün “hüquqi əsas” verir. Məlum olduğu kimi, şadlıq evləri çox gəlirli müəssisələr sayılır. Xüsusilə də Bakı şəhərində 1000-dən yuxarı şadlıq evi fəaliyyət göstərir. Bununla yanaşı, çoxlu iri restoranda da kütləvi mərasimlər (toy, ad günü və s.) keçirilir. Təbii ki, yeni standartlar bu obyektlərin hamısını əhatə edir və yeni bazarlıqlar ortaya çıxır. Yada salaq ki, prezident İlham Əliyev çıxışlarından birində ölkədə iş adamlarının, sahibkarların fəaliyyətinə qərəzli şəkildə maneə törədilməsi kimi faktın olmasından danışıb. O, bu halları pisləyib və ölkəmizin iqtisadi inkişafı naminə məmurları bu kimi çatışmazlıqlara son qoymağa çağırıb. Amma komitə yanında fəaliyyət göstərən Texniki Tənzimləmə və Standartlaşdırma üzrə Dövlət Nəzarəti Xidməti və onun ayrı-ayrı regional şöbələrinin rəhbər şefləri Ramiz Həsənovun himayədarlığı ilə sahibkarlara “qan uddurur”. Komitə rəhbərliyindəki qüvvələr arasında rəqabət də var. Açıq şəkildə büruzə verilmir. Lakin mötəbər mənbədən “Gündəm-xəbər”ə verilən məlumata görə komitə sədri ilə aparat rəhbəri yola getmir. Xaçmazın sabiq deputatı, Standartlaşdırma, Metrologiya və Patent üzrə Dövlət Komitəsinin aparat rəhbəri Arif Əşrəfovla Ramiz Həsənov arasında müəyyən rəqabət var. Aparat rəhbəri komitədə heç kimlə, hətta sədr Ramiz Həsənovla belə hesablaşmır. Prezident açıq şəkildə ifadə etdi ki, sahibkarlara qarşı əsassız təzyiqlər var, yerli icra hakimiyyəti və hüquqmühafizə orqanları bəzi hallarda sahibkarlara problemlər yaradırlar. Bu kimi halların yolverilməzliyini bir daha vurğulayan dövlət başçısı hər şeydən xəbərdar olduğunu və neqativ hallara son qoyulmasının vacibliyini diqqətə çatdırıb. Görünən odur ki, adıçəkilən komitə hələ də susqunluğunu qorumaqda və prezidentin göstərişlərinə laqeyd münasibət bəsləməkdə davam edir. Mediada yayılan məlumatlara görə, sahibkarlar mütəmadi olaraq adıçəkilən komitənin onların normal fəaliyyətinə müxtəlif maneələr yaratmağa çalışdığı barədə müraciətlər ediblər. Odur ki, Ramiz Həsənovun prezidentin tövsiyyələrinə ilk qoşulanlardan biri olacağını gözləməkdən təbii heç nə ola bilməzdi. Amma görünən odur ki, ölkə rəhbərliyi sahibkarlıq fəaliyyətinə qanunsuz müdaxilələrin aradan qaldırılmasına dair dövlət orqanlarına verdiyi ciddi tapşırıqlar Ramiz Həsənov tərəfindən icra edilmir. Bu isə Ramiz Həsənov üçün heç də xoş perspektiv vəd etmir. Ən azından ona görə ki, prezident həmin müşavirədə qətiyyətlə bəyan etdi ki, tapşırıqlara əməl etməyənləri ciddi cəzalar gözləyir. Komitənin həmçinin məzuniyyət vaxtı orta əmək haqqının müəyyən edilməsi və kollektivin mükafatlandırılması zamanı bəzi nöqsanlara yol verdiyi, bununla da əmək haqqı hesablanan zaman artıq vəsaitin xərcləndiyi açıqlanıb. Müəyyən edilmiş nöqsanların aradan qaldırılması məqsədi ilə həyata keçirilən tədbirlərin nəticələri barədə Komitə tərəfindən təqdim edilmiş məlumata əsasən cəmi 24,2 min manat məbləğində vəsait dövlət büdcəsinə bərpa edilib. Əvəzçilik üzrə şöbə müdiri vəzifəsinə təyin edilmiş şəxslərə tam iş vaxtı üçün əmək haqqı 50% həcmində müəyyən edilib və 40,1 min manat dəyərində alınmış qeyri-maddi aktivlər uçota alınıb.
Əgər palata yoxlama aparmasaydı, mənimsənilən milyonlar dövlət büdcəsinə geri qaytarılmayacaqdı. Mətbuatda yazılanlara görə, bütün bu faktlar Ramiz Həsənovun işinin öhdəsindən layiqincə gələ bilmədiyini göstərir. Özəl qaynaqların bildirdiyinə əsasən, Hesablama Palatasının son yoxlaması sədrin başını əməlli-başlı cəncələ salıb. İddialara əsasən, yoxlama nəticəsində aşkara çıxarılmış faktlar yuxarı dairələrdə narahatlıqla qarşılanıb. Ramiz Həsənovun görəvdən alınma məsələsi gündəmə gəlib. Deyilənə görə, komitə rəhbəri postunu qorumaq üçün artıq bəzi nüfuzlu şəxslərə minnətçi düşüb. Ancaq o da deyilir ki, artıq bir neçə aydır Standartlaşma, Metrologiya və Patent üzrə Dövlət Komitəsinin (SPMDK) sahibkarlıq obyektlərində apardığı yoxlamalar kəskin məhdudlaşdırılıb. Bu isə komitə əməkdaşlarının ürəyincə deyil. Vəziyyətdən ən çox narazı qalan isə SPMDK sədri Ramiz Həsənovdur. O, hökumət dairələrini inandırmağa çalışır. Ki, rəhbərlik etdiyi qurumun təftişlərinin dayandırması bir sıra sahibkarların geniş əl-qol açmasına gətirib çıxarıb. Elə bunu əsas gətirən komitə sədri SPMDK-nın yoxlamalara başlamasına icazə verilməsini istəyir. Yoxlamalarla bağlı hansı yeniliyin edildiyi məlum deyil. Sadəcə, o məlumdur ki, Həsənovun komitəsinə sahibkarlıq fəaliyyətlərinin yoxlanılması yönündə qadağa qüvvədə qalır.
Qeyd edək ki, Ramiz Həsənov 1961-ci ildə Marneulinin Algent kəndində anadan olub. 1975-1981-ci illərdə Gürcüstan SSR Kənd Təsərrüfatı nazirinin müavini olan Ayvaz Həsənovun oğludur. 2004-2005-ci illərdə Azərbaycan Respublikasının Gürcüstandakı Fövqəladə və Səlahiyyətli Səfiri vəzifəsində çalışıb. 2005-ci ilin dekabr ayında Azərbaycan Respublikasının Standartlaşdırma, Metrologiya və Patent üzrə Dövlət Agentliyinin Baş direktoru vəzifəsinə təyin edilib. 2008-ci ilin noyabrından Azərbaycan Respublikasının Standartlaşdırma, Metrologiya və Patent üzrə Dövlət Komitəsinin sədridir. Evlidir, iki övlad atasıdır.
Hörmətli komitə sədrinin ittihamlarla bağlı mövqeyini dinləməyə hazırıq.
