32 illik iş təcrübəsi olan tibb bacısı çalışdığı müəssisədə haqsızlıqla üzləşib. Buna qarşı mübarizə aparmağa çalışan tibb bacısı hazırda işini itirmək təhlükəsi ilə üz-üzə qalıb. Pozulmuş hüquqlarının bərpası ilə bağlı cavabdeh qurumlara rəsmi müraciət edən şikayətçi məsələnin ictimailəşməsi üçün “Cümhuriyət” qəzetinə üz tutub.
Söhbət Nəsimi rayonundakı 20 saylı poliklinikanın travmatoloji məntəqəsində tibb bacısı vəzifəsində işləyən Bikəxanım Zeynalovadan gedir. Qadın iddia edir ki, çalışdığı səhiyyə müəssisəsində gördüyü haqsızlıqlardan, özbaşınalıqlardan və işçilərin hüquqlarının pozulmasından yorulub. İllərdir ki, bununla mübarizə aparır, amma nəticəsi yoxdur. Əksinə, vəziyyət onun ziyanına işləyir. İş o yerə çatıb ki, səhiyyə müəssisəsində işləyən digər işçilər də rəhbərliyin təzyiqi ilə Bikəxanım Zeynalovaya qarşı qaldırılıb.
Travmatoloji məntəqədə soyğunçuluq...
Tibb bacısının sözlərinə görə onun 32 illik iş təcrübəsinin 22 ilini travmatologiya şöbəsində, 7 ildən çoxunu isə sırf 20 saylı poliklinakının travmatologiya mənqəsində gibs mütəxəssisi olaraq çalışıb. Bu illər ərzində respublikanın çox tanınmış travmatoloqları, elmi işçiləri ilə işləyib və onlar işindən həmişə razı qalıb. B.Zeynalova hazırda işlədiyi 20 saylı poliklinikanın travmatoloji məntəqəsinin böyük tibb bacısı Aynurə Adıgözəlovadan şikayətlənib. Böyük tibb bacısının rolu ilə müəssisə daxilində baş verən özbaşınalıqlardan danışıb. O, travmatologiya mənqəsinin fəaliyyətə başladığı müddət ərzində Aynurə Adıgözəlovanın gips otağında səhər növbəsində heç bir texniki işlə məşğul olmağa imkan vermədiyini və bu işlə yalnız özü məşğul olduğunu bildirib:
“Məntəqədə bir sarğı, bir gips otağı var. Söhbət gibs otağından gedir. Hansı ki, burada yalnız gips texniki kursunu keçmiş mütəxəssislər işləyə bilər. Aynurə Adıgözəlova 7 ildə, məzuniyyətdə olduğu günlərdə belə bu otaqda səhər növbəsində heç birimizin işləməsinə icazə verməyib, özü işləyib. Bunu gips otağında işlənən materiallar və həmin otağın təhvil-təslim jurnalındakı imzalar da təsdiq edir. Xəstələrin qəbul jurnalında da hansı tibb bacısının bu işi gördüyü qeyd edilir. Aylıq qrafik tutulan zaman bir neçə dəfə bu məsələyə etirazımı bildirmişəm. Ona səhər növbəsində bizim də işləmək hüququmuzun olduğunu demişəm. Çünki onun işi baş tibb bacısı olaraq başqadır. O, isə mənə “get, kimə, hara istəyirsən, şikayət elə, mən böyük tibb bacısıyam, necə istəyirəm, elə də işləyirəm” deyə özbaşına iş sistemi qurub. Halbuki nizamnaməyə əsasən texniki kurs keçmiş hər bir tibb bacısı həm səhər, həm günorta, həm də axşam növbəsində işləməlidir. Tibb bacısı Adıgözəlova boynuna düşməyən işləri çox həvəslə gördüyü halda, məsuliyyət daşıdığı işlərdə qanunsuzluqlar edir. Şöbənin materialla təmini məsələsində əməlli-başlı soyğunçuluq yaradıb. Travmatoloji məntəqədə ən çox işlənən bintdir. Amma o, hər növbəyə bir və ya iki bint qoyur. Çox vaxt isə məntəqədə bint olmur. Günortadan sonra bizə müraciət edən xəstəni bint almaq üçün aptekə göndərəndə nələr dediyini təsəvvür edin. Onun bu hərəkətinə görə xəstə əvvəl növbədə olan həkimi və tibb bacısını təhqir edir. Dəfələrlə buna görə xəstələr narazı halda yola salınıb. Dövlət xəstəxanasının bu vəziyyətdə olmasına etiraz edərək, haqlı narazılıqlarını dilə gətiriblər”.
“Düz danışan adamı təkləyirlər”
Bikəxanım Zeynalova deyib ki, dəfələrlə böyük tibb bacısının bu hərəkətlərinə etiraz edib. Amma bunun əvəzində hər dəfə haqsız duruma salınaraq, işçilər arasında da gözdən salınıb:
“Bu adam şöbəni zəruri təsərrüfat malları ilə təmin etmir. Yəni bütün tibb müəsssisələri təsərrüfat sabunu, təmizləyici vasitələr, qab şampunu, təsərrüfat əlcəkləri və s. ilə təmin olunduğu halda, bizim şöbədə bunların hamısını işçilər alır. Bəzən isə bu təminatlar birinci növbədə olur. Əlbəttə ki, bu məlum səbəbdən və yaxud hansısa komissiyanın gələcəyi gözlənilən zaman baş verir. Dövlət verir də bunu, amma hardasa “ilişir”. Bilmirəm Aynurədə “ilişir”, yoxsa ondan əvvəlkində “ilişir”. Axır ki, süzgəcdən keçir və xəstəyə gəlib çatmır. Camaatı niyə narazı salaq? Mən niyə əsəb keçirməliyəm? Hicablı xanımam. Mənə deyilməyən söz qalmır ki, başında yaylığın var, “abırınız, həyanız olsun, utanmırsız” kimi sözlər eşidirəm.
Xəstələri inandıra bilmirəm ki, bu materialları bizə verməyiblər. İşçiləri bir-birinə qatırlar, yalançı ajiortajlar, heç nədən mübahisələr yaradırlar. Düz danışan adamı təkləyirlər. Bu kollektivdə mən özümə qarşı bir təklənmə hiss edirəm. Bilirəm ki, Yaponiyada iş kollektivində xasisyyəti tutmayan işçiləri bir-birinin yanında saxlamırlar. Hətta siqaret çəkənlərlə çəkməyənləri bir-birinin yanına salmırlar. Çünki bu işin keyfiyyətinə təsir edəcək. Hər şeyi fikirlərşirlər.
Mən şikayət edən adam deyiləm. Amma bıçaq sümüyə dirənib. Yay olur, kondinsioner işləmir, pul yığırlar, sonra işləyir. Qışda da həmçinin... Rentgen aparatı sınır, işçilərdən onun düzəlməsi üçün pul yığılır. 170 manat maaş alırıq. Niyə bunları verməliyik? Quru əməkhaqqıya işləyirəm, niyə verməliyəm axı? Mənə yaraşmaz ki, xəstəyə deyim 5-10 manat “hörmət” etsin. Bunu bacaranlar var. Amma mən o işlərdə yoxam”.
Şikayətçi səhər növbəsində üzləşdiyi haqsızlığa görə rəhbərlikdən əmək müqaviləsini tələb edib: “Hansı ki, orada yazılıb ki, daxili nizamnamə necə olmalıdır. Əlbəttə ki, orada sürüşkən qrafik mütləq yazılıb. Mən istəyirdim biləm ki, hüquqlarım nə dərəcədə pozulur. Amma onu mənə göstərən olmadı. Şöbə müdiri dedi ki, ümumiyyətlə, belə bir sənəd yoxdur. Necə ola bilər ki, idarədə daxili nizamnamə olmasın”.
“Bilirəm ki, buna görə başımı heç kim sığallamayacaq”
Bikəxanım Zeynalova qeyd edib ki, əslində çalışdığı müəssisədən şikayət etməsində başı ağrıyacaq. Hətta onu bu şikayətinə görə işindən də kənarlaşdıra bilərlər: “Bilirəm ki, buna görə mənim başımı heç kim sığallamayacaq. Bu məsələ ictimailəşəndən sonra daha da pis olacaq. Hətta kollektiv üzümə dura bilər. Çünki şöbə müdiri desə ki, qatıq qaradır, hamı bununla razılaşacaq. 5-3 manat pul məsələsi var, onlar da buna məcburdurlar. Çünki bir dəfə belə bir şey olub. İşçilərin hər birinə rəhbərlik mənə qarşı imza atdırıb. Onlar da baxmayıblar nəyə imza atıblar. İclasda məlum olmuşdu ki, hamı məndən şikayətçidir. Mən yaltaqlığı, xəbərçiliyi sevmirəm. Sadəcə, istəyim və tələbim hüquqlarımın bərpası və iş rejiminin bütün işçilərə bərabər şəkildə sistemləşməsidir”.
Bikəxanım Zeynalovanın sözlərinə görə, müəssisənin məsul şəxsləri ona olan münasibətə görə Əmək Məcəlləsinin 290-cı maddəsinin, Azərbaycan Respublikası Konstitusiyasının 46-cı maddəsinin pozulmasına görə cavabdehlik daşıyırlar.
Şikayətçi bununla bağlı Səhiyyə Nazirliyinə, Əmək və Əhalinin Sosial Müdafiəsi Nazirliyinin yanında Dövlət Əmək Müfəttişliyi xidmətinə, Əsgər Anaları Cəmiyyətinə, 20 saylı Polinklinikanın baş həkimi Tamerlan İsmayılova rəsmi müraciət edib.
