AXCP funksioneri, jurnalist Xaliq Bahadırın “Azadlıq” qəzetində “Saxta seçki subyektləri” başlıqlı köşə yazısı dərc olunub. Yazıda jurnalist seçkilərdə iştirak edən qurumların və onların rəhbərlərinin ünvanına ağır ittihamlar səsləndirib.
AXCP təfəkkürünün açıq şəkildə sezildiyi köşədə X.Bahadır seçkilərə qatılan qurumların hakimiyyətə işlədiyini, hakimiyyətlə əlbir olduğunu bildirib. Partiya funksioneri MSDM rəhbəri İsa Qəmbər, Müsavat başqanı Arif Hacılı, AXP lideri Pənah Hüseyn və KXCP sədri Mirmahmud Mirəlioğlunun ünvanına aşağılayıcı tonda ittihamlar irəli sürüb.
X.Bahadır adları çəkilən bu şəxslərin seçkilərdə iştirak etməklə, hakimiyyətlə bazarlığa getdiklərini qeyd edib. Qeyd edək ki, X.Bahadır zaman-zaman bu tipli yazılarla gündəmə gəlir. Daim də təhqirlər yağan yazılarında bir müxalifət liderini çıxmaqla, digərlərini ittiham edir. Sanki Əli Kərimlidən başqa bütün müxalifət hakimiyyətə işləyir...
Heç şübhəsiz ki, köşə yazarının fikirləri müxalifət düşərgəsində ciddi narazılıq doğurub.
Müsavat başqanının müavini Elman Fəttah AXCP funksionerinin ittihamlarının məqsədli şəkildə ortaya atıldığı qənaətindədir: “Biz dəfələrlə qeyd etmişik ki, Müsavat Partiyasının siyasətinin əsasını siyasi məhbuslar və mübarizəni müxalifətin daxilindən çıxarıb hakimiyyətə qarşı yönəltmək təşkil edir. Çünki mübarizəni müxalifətin daxilində aparmağa səy göstərən qüvvələr var. Bunun üçün həmin qüvvələr gecə-gündüz çalışırlar. Biz bu prosesdə iştirak etməməyə, iştirak edənlərin isə qarşısını almağa çalışırıq. Xaliq Bahadırın həmin köşə yazısı, Müsavata qarşı yönəltdiyi murdar ittihamlar müxalifətdaxili intriqanı artırmağa, hakimiyyətə qarşı aparılan mübarizənin qarşısını almağa çalışan düşərgəyə xidmət edən fikirlərdir. Mütəmadi olaraq, biz Xaliq Bahadırın bu cür yazılarını görürük. Məqsəd bu cür ittihamlara Müsavatdan da kimlərinsə cəlb edilməsi və bununla mübarizəni hansısa qurumlar, yaxud partiya funksionerləri səviyyəsinə endirməkdir”.
E.Fəttah X.Bahadırın həbsdə olan Müsavat başqanının müavini Tofiq Yaqublunun da adını köşə yazısına salmasına münasibət bildirdi: “Çox absurd bir yanaşmadır. Çünki Tofiq bəyin özü Müsavatın seçkidə iştirakından məlumatlıdır və hətta namizədliyi də irəli sürülüb. Siyasi məhbusları önə çəkən qurum və köşəni yazan şəxs mövqeyini Avropa Oyunları zamanı ortaya qoymalı idi. Çünki həmin vaxt beynəlxalq aləmlə siyasi məhbuslar məsələsində birgə iş gedirdi. Müsavat siyasi məhbuslar azad olunmasa, xarici ölkələrin dövlət başçılarının Avropa Oyunlarında iştirak etməməsi ilə bağlı çağırış edib. Eyni sənədə Avropa Birliyi də imza atıb. Faktiki olaraq, oyunlar Avropa ölkələrinin rəhbərlərinin iştirakı olmadan keçirilib. Həmin vaxt nəinki siyasi məhbusları alver predmetinə çevirən bu şəxslər münasibət bildirmədilər, hətta Avropa Oyunlarının Azərbaycanın milli maraqlarına xidmət etdiyini göstərən yazılarına rast gəldik. İndi Xaliq Bahadır da bu yazıda Tofiq bəyin adını çəkməklə onu müdafiə etmir, əksinə, siyasi məhbus üzərindən öz maraqlarını təmin etmək istəyir. Bununla da siyasi məhbus adını istismar edir”.
Müsavat başqanının müavini AXCP funksionerinin seçkiləri boykot etmək çağırışına da münasibət bildirdi: “Siyasətimiz ondan ibarətdir ki, mübarizə fasiləsiz, prinsipal şəkildə davam etməlidir. Seçki dövründə də, əlimizdə olan imkanlardan yüksək səviyyədə istifadə edib, rejimə qarşı mübarizəni davam etdiririk. Bu çox əziyyətlidir. Böyük fədakarlıqlar tələb olunur. Seçkidə iştirak etməyən qurumlara qarşı hər hansı bir təzyiq aparılmır. Amma Müsavatın namizədlərinə qarşı edilən təzyiqlər hər kəsə məlumdur. Əgər seçkidə mübarizə üçün bir şans qalmayacaqsa, yalnız o zaman iştirak edib-etməmək məsələsi müzakirə oluna bilər. Siyasəti düzgün aparmaq lazımdır”.
KXCP sədri Mirmahmud Mirəlioğlu X.Bahadırın onun barəsində səsləndirdiyi fikirlərə daha sərt münasibət bildirdi: “Azərbaycanda elə adamlar var ki, çoxdan oxunmuş kitablardır. Onlar oxunub, qatlanıb, arxivə qoyulublar. Hətta üzərinə yazılıb ki, ”oxumaq olmaz!" Bu yazının müəllifi aşağıdan-yuxarı öz ətrafına baxmalıdır. Ona məsləhət verənlərə, yazılarını redaktə edənlərə, yazılarına senzura qoyanlara yaxşı baxmalıdır. Əgər baxsa, ayıbına kor olub danışmaz. Onlar çox istəyirlər ki, mən bu işi görənlərin, icra edənlərin layiqli paylarını verim. Amma onlar heç nəyə layiq olmadıqlarına görə heç bir cavab vermirəm. Hər şeyi vicdanlarına buraxıram. Əgər vicdanları yoxdusa, özləri bilərlər, nə istəyirlər danışsınlar. Heyf o çörəkdən ki, belə yeyirlər. Heyf o uşaqlardan ki, bunların qələmi ilə qazanılan çörəyi yeyirlər. Belə Azərbaycan övladlarına heyfsilənirəm. Bu adamlar ad-soyadlarını dəyişməlidirlər. İmzalarını da dəyişib, başqa ad götürməlidirlər. Məsələn, filankəs böhtançı, şər filankəs, “işverən” filankəs kimi adlar ola bilər. Nəyi mən haqq bilirəmsə, o yolda da olacam. Dövlətçiliyin bərpasında iştirak etmişəm, qan, övlad vermişəm. Bu dövlətin mahiyyətini də, iqtidarını da, bu cür müxalifətçilik etməyin mahiyyətini də, kimin hansı dəyirmana su tökdüyünü də yaxşı bilirəm".
