Hazırda ölkə əhalisinin də, ölkə mediasının da sağdan-soldan, dörd bir tərəfdən dayanmadan ən çox zərbə endirdiyi dövlət qurumu Əmək və Əhalinin Sosial Müdafiəsi Nazirliyi, məmur isə bu quruma rəhbərlik edən Sahil Babayevdir.
Sahil Babayev haqqında əhali arasında narazılıq yaradan səbəblərdən biri sağlamlığında heç bir problemi olmayanların pensiya alması, xəstəliyi, əlilliyi olduğu halda, maddi imkanı olmadığı üçün pensiya ala bilməyənlər idi.
O qədər dedilər, o qədər yazdılar ki, Cənab nazir axırda dözməyib hamının pensiyasını kəsdi və qərar verdi ki, bu günə qədər pensiya alan hər kəsin səbəbləri yenidən araşdırılsın.
Hər hansı bir qurumda baş verənlər üçün həmişə təbii olaraq, qurumun rəhbərliyini qınayırıq. Amma, bir məsələnin fərqinə varmırıq ki, qurum rəhbəri tabeçiliyində çalışan bütün işçilərin hər birinə tək-tək nəzarət edə bilməz.
Doğrudur, işçilərinə özbaşınalıq etməyə risk edəcək qədər cəsarəti və sərbəstliyi verən rəhbərliyin nəzarətsizliyidir.
Amma, yenə də deyirik, hər hansı quruma rəhbərlik edən heç bir məmurun rəhbərlik etdiyi quruma, işçilərinə tək-tək nəzarət edəcək qədər vaxtı yoxdur. Onun da öz işləri, öz biznesləri var.
Əlqərəz...
Qayıdaq pensiya məsələsinə.
Bildiyimiz kimi artıq bir neçə müddətdir ki, dərəcəsindən asılı olmayaraq, çox sayda əlillərin pensiyaları ləğv edildi və yenidən araşdırılmağa başladı.
Amma, nə faydası?!...
Deyəsən, yenə də Əmək və Əhalinin Sosial Müdafiəsi Nazirliyinin xeyli sayda işçiləri, eyni zamanda səhiyyəmizin "Hippokrat andına sadiq" bəzi həkimləri, əl-ələ, baş-başa verib, həmrəylik nümayiş etdirirlər. Yəni, yenə də pulu olan "pensiya kartı"nı təkrar əldə edə bildi, pulu olmayanlar, lakin həqiqi əlilliyi, xəstəliyi olanlar, hətta əmək qabiliyyəti ümumiyyətlə olmayanlar isə xəstəxana qapılarında, Dövlət Sosial Müdafiəsi Fondu (DSMF) qapılarında hər gün tezdənnən gəlir, axşama qədər növbə gözləyib, gedirlər...
Beləcə, "pensiya ümidi" ilə qalan ömürlərini də gözləmə zallarında yaşamağa davam edirlər.
Söhbətə bu cür başlayıb, bu qədər uzun-uzadı danışmağımız əbəs yerə deyil.
"DogruXeber.az" İnformasiya agentliyinin redaksiyasına İmişli rayon, Aranlı kənd sakini Əliyev Mehman Qədir oğlu müraciət edib.
Mehman Əliyev müraciətində bildirir ki: - "Həmkəndlim Yadigarov Bayraməli İxtiyar oğlu "maklerlik" edir. Belə ki, o tanıdığı, bildiyi adamlardan pul alıb, onlara pensiya düzəldir. Bundan əlavə, Yadigarov Bayraməli özü heç bir xəstəliyi olmadığı halda, birinci qrup əlilliyə görə pensiya alır. Həmçinin, həyat yoldaşı Nigar, iki qızı - Aytəkin və Tünzalə, 4 nəvəsi - Zəhra, Məhəmməd, Amil və Elton hazırda saxta yollarla pensiya alaraq, dövlət büdcəsinə ziyan vururlar.
Yadigarov Bayraməlinin bu cür saxta əməllərlə məşğul olmasında ən böyük yardımçısı, daha doğrusu işlərin başında duran isə oğlu Yadigarov Turaldır.
Yadigarov Tural Bayraməli oğlu İmişli regional Dövlət Sosial Müdafiə Fondunda (DSMF) şöbə müdiri vəzifəsində çalışır.
Tural özü də yerli sakinlərdən pul alaraq, onlara pensiya, yaxud ünvanlı sosial yardım alması üçün saxta sənədlər düzəldir. Misal olaraq qeyd edə bilərəm ki, İmişli rayon, Qaralar kənd sakini Xudiyev Sabir bir neçə ildir ki, 7 uşağına görə ünvanlı sosial yardım alırdı. Uşaqlardan biri 18 yaşına çatdığı üçün, bu yaxınlarda onların hamısının yardımı dayandırıldı. Yenidən digər 6 uşağa görə ünvanlı sosial yardım almaq üçün Sabir Xudiyev DSMF-na müraciət edib. Orada, Sosial müavinətlər şöbəsində müdir vəzifəsində çalışan Tural Yadigarov onunla şərt kəsib ki, "mən sənin sənədlərini düzəldəcəm və ilk 6 ayını mən alacam."
Razılaşıblar. Lakin, sonra Sabir Xudiyev verdiyi sözü geri götürüb.
Yəni, alacağı ünvanlı sosial yardımın ilk 6 ayını Tural Yadigarova verməkdən imtina edib.
Y. Tural da X. Sabirin bu hərəkətindən bərk əsəbiləşib və ona deyib ki, "Mən sənin yardımını kəsim, sən də bax". Artıq, 4 aydır ki, Sabir Xudiyev ünvanlı sosial yardım ala bilmir. Hazırda bu məsələ Sabir Xudiyevin iddiası əsasında İmişli rayon prokurorluğunda araşdırılır."
Əslində, Mehman Əliyevin həmkəndlisi Yadigarov Bayraməli haqqında sürdüyü iddialar təkcə yuxarıda qeyd etdiklərimizdən ibarət deyil.
Mehman Əliyev daha sonra Bayraməli Yadigarovun onu silahla hədələməsi, ona böhtan atması və sair bu kimi digər iddiaları barəsində geniş yazıb, izləyicilərimizi yormaq istəmirik.
Bütün iddia olunanlar barəsində daha ətraflı aşağıdakı linkə toxunaraq, "MUM.TV" "You Tube" kanalımızda, elə Mehman Əliyevin öz dilindən eşidə bilərsiniz.
P.S: Yeri gəlmişkən, onu da bildiririk ki, Mehman Əliyevin bütün iddiaları barəsində qarşı tərəfin də mövqeyini dinləmək məqsədilə Yadigarov Bayraməliyə zəng etdik. O söhbətimizin əvvəlində bütün suallarımıza - "yalan deyir, hamısı böhtandır. Onun oğlu mənim nəvəmi maşınla vurub, uşaq Şirvanda xəstəxanada yatdı. İndi ambulator müalicə alır. Oğlum Tural da pensiya işinə baxmır. Yalan deyir o", deyərək cavab verdi.
Sonra əlavə etdi ki: - "Mehman mənə 5.000 (beş min) manat pul borcludur, nə vaxt pulumu istəsəm mənə böhtan atır. O yalan danışır, siz onu niyə yazırsınız?"
Biz Bayraməli Yadigarovun diqqətinə çatdırdıq ki, bizim işimiz vətəndaşın müsahibəsini, eyni zamanda qarşı tərəfin mövqeyini yayımlayıb, ictimailəşdirmək və aidiyyatı qurumların diqqətinə çatdırmaqdır. Araşdırmaq və barəsində qanuni tədbirlər görmək isə hüquq-mühafizə orqanlarının işidir. Biz bütün bu məsələlərin araşdırılması üçün aidiyyəti qurumlara sorğular göndərəcəyik. Əgər faktlar öz təsdiqini taparsa, qurumlar özləri bu barədə lazımi tədbirlər görəcəkdir. Yox, əgər sizin də vurğuladığınız kimi, şər-böhtan olduğu ortaya çıxarsa, sizin ixtiyarınız var ki, o adama qarşı iddia qaldırasınız."
Bundan sonra, Bayraməli Yadigarov israrla bizim bu məlumatları ictimailəşdirməmizə təsir etməyə çalışdı. Hətta, bizi güya ona "hədə-qorxu" gəlməkdə də günahlandırdı.
Qeyd: Qeyd edirik ki, redaksiyamızda aparılan telefon danışıqları tərəfimizdən hər zaman qeydə alınır və hər dəfə də bu qarşı tərəfin diqqətinə çatdırılır.
Daha sonra Bayraməli Yadigarov bizə bildirdi ki, "mən sabah əlimə bir butulka benzin götürüb, gedəcəm Heydər Əliyevin büstünün yanına. Orda gəlib məndən müsahibə götürərsiniz."
Bayraməli Yadigarovun bu addımının nə demək olduğunu hələ ki, anlamış deyilik. Amma, onu bütün izləyicilərin diqqətinə bir daha çatdırırıq ki, "DogruXeber.az" informasiya agentliyinin kimsə ilə qərəzi, yaxud hər hansı bir şəxsi prinsipi yoxdur. Kimliyindən asılı olmayaraq, hər kəsin fikirlərini və məlumatlarını, eyni zamanda qarşı tərəfin mövqeyini ictimailəşdirmək və aidiyyatı qurumların diqqətinə çatdırmaq bizim peşə borcumuzdur.
Redaksiyamız hər kəsin söz haqqını tanıyır.
DogruXeber.az
